काठमाडौं । मोहित सुरीको ‘हाफ गर्लफ्रेन्ड’सँगै रिलिज गरेर चलचित्र ‘हिन्दी मिडियम’ ले दर्शकलाई पनि अचम्मित बनाएको थियो । तर इरफान खानको यो निर्णय सामान्य नै रह्यो । ‘हिन्दी मिडियम’को तुलनामा ‘हाफ गर्लफ्रेन्ड’ले बक्स अफिसमा राम्रो गर्ने निश्चित थियो । ‘हिन्दी मिडियम’ले कमजोर सुरुआत गरे पनि इरफान खानका कारण दर्शकले राम्रो प्रतिक्रिया दिइरहेका छन् । चलचित्रले बिस्तारै बक्स अफिसमा पकड जमाउँदैछ । 
खासखबरका अनुसार दर्शकले चलचित्रलाई निकै प्रशंसा गरेका छन् । कथामा ताजगी र उम्दा अभिनय साकेत चौधरीको सही निर्देशनले दर्शकलाई आकर्षित गरेको छ । 
पहिलो दिन चलचित्रले २ करोड ८१ लाखको कारोबार गरेको थियो । दोस्रो दिन ५१ प्रतिशत वृद्धि गर्दै ४.२५ करोडको कमाइ गर्यो । आइतबार तेस्रो दिन चलचित्रले बक्स अफिसमा ५.५० करोड कमाइ गरेको छ । आफ्नो पहिलो विकेन्डमा चलचित्रले १२.५६ करोडको कारोबार गरेको छ । दर्शकका साथै निर्माताको अपेक्षा अनुसार चलचित्रले राम्रै कमाइ गर्ने संकेत दिएको खासखबरले लेखेको छ ।