विराटनगर । प्रदेश १ बाट कोरोना भाइरस (कोभिड १९) आशंकामा ४६ जनाको नमुना संकलन भएको छ । तीमध्येमा १० महिला छन् । 

प्रदेश १ सामाजिक विकास मन्त्रालयका प्रवक्ता सुरेश मेहताले भने, “संकलन गरिएकामध्ये ३० जनामा कोरोना देखिएन । १६ जनाको रिपोेर्ट आउन बाँकी छ ।” मेहताका अनुसार झापाबाट पाँच, मोरङबाट सात, सुनसरीबाट २५, धनकुटाबाट एकजना, तेह्रथुमबाट दुई, सोलुखुम्वुबाट दुई, उदयपुरबाट एकजना र पाँचथरबाट तीनजनाको नमुना संकलन गरिएको हो । सरकारले काठमाडौंबाहिर धरानस्थित बीपी प्रतिष्ठानमा कोरोना परीक्षण ल्याब सञ्चालनमा ल्याएको छ । 

यस्तै प्रदेश १ मा आज सम्ममा चार महिलासहित ७ जना आइसोलेसनमा रहेको मेहताले बताए । सोलुखुम्बुमा एक, उदयपुरमा दुई, पाँचथरमा तीन र ताप्लेजुङबाट एकजना आइसोलेसनमा भर्ना भएका छन् । दुईजना डिस्चार्ज भइसकेको प्रवक्ता मेहताले जानकारी दिए ।

प्रदेश १ मा हालसम्म ३५ अस्पतालका ३ सय ६१ आइसोलेसन बेड तयारी अवस्थामा छन् । यस्तै सामाजिक विकास मन्त्रालयले प्रदेशका जिल्ला स्वास्थ्य कार्यालय, स्थानीय तह, सुरक्षा निकाय तथा अस्पतालहरूलाई कोरोना नियन्त्रणसम्बन्धी विभिन्न सामग्री वितरण गरेको छ । 

मन्त्रालयले आज पीपीई सेट २ सय ९७ थान, आईआर थर्मामिटर १६ थान, सर्जिकल मास्क २२ हजार १ सय ५० थान, ग्लोब्स १८ हजार ५ सय २६ थान, ह्याण्ड सेनिटाईजर ८ सय १८ थान र पीपीई गाउन ३५ वटा वितरण गरेको प्रवक्ता मेहताले बताए । 

यसैबीच प्रदेश १ का स्वास्थ्य संस्थाहरूले फिबर क्लिनिक बन्द गरेको भन्दै अविलम्ब सञ्चालन गर्न मन्त्रालयले निर्देशन दिएको छ । सामाजिक विकास मन्त्रालयले आकस्मिक र फिबर क्लिनिकबाहेकका सेवा बन्द गर्न निर्देशन दिए पनि कतिपय स्वास्थ्य संस्थाहरूले फिबर क्लिनिक पनि बन्द गरेको गुनासो आएपछि अविलम्ब सञ्चालन गर्न मन्त्रालयले निर्देशन दिएको हो ।