काठमाडौं । कोरोना भाइरसका कारण नेपाल मेडिकल काउन्सिलले चैत ८ गते लिने एमबीबीएस र बीडीएस तहको लाइसेन्स परीक्षा स्थगित गरेको छ ।
 
काउन्सिलका प्रवक्ता डा. कृष्णप्रसाद अधिकारीले कोरोना भाइरसको संक्रमण विश्वव्यापी महामारीको घोषण भएपछि नेपालमा पनि उच्च जोखिम भएकाले  परिक्षा अनिश्चितकालका लागि स्थगित गरिएको बताए । उनले मंगलबार बसेको काउन्सिलको पूर्ण बैठकले कोरोना भाइरसको सम्भावित संक्रमणविरुद्ध सतर्कता अपनाउन परीक्षा स्थगित गरिएको बताए । 

उनले भने, “एमबीबीएस र बीडीएस तहको लाइसेन्स परिक्षा अनिश्चित कालका लागि स्थगित गरिएको छ ।”

यसपटकको परीक्षामा सहभागी हुन एमबीबीएस तथा बीडीएस उत्तीर्ण भएका १ हजार ६० जनाले आवेदन दिएको काउन्सिले जनाएको छ । 

सोमबार स्वास्थ्य विज्ञहरुले विश्वमा कोरोनाको महामारी भएकाले अहिले भिडभाड र परीक्षा लिने कार्य गर्नु खतरा हुने सुझाव दिएका थिए ।