काठमाडौं । १६ महिना अगाडि आगोले जलेर थलिएका अछाम भैरवथानका राउटे युवा कपिलदेव शाही अहिले वीर अस्पतालको ट्रमा सेन्टरमा उपचार गराइरहेका छन् । नजिकै आगो बालेर सुतेका कपिल राति आगो फैलिएर जलेका थिए । 

आगोले जलेका १८ वर्षीय कपिल राउटे समुदायका अध्यक्ष वीरबहादुर शाहीका छोरा हुन् । जलेर सख्त घाइते भए पनि उनी लामो समयसम्म स्थानीय जडिबुटीकै भरमा थिए । घाउ निको नभएपछि उनलाई राउटे उत्थान प्रतिष्ठान नेपाल र उपराष्ट्रपति नन्दबहादुर पुनका छोरा दिपेश पुनको सहयोगमा काठमाडौं ल्याइएको हो । उपचारका लागि काठमाडौं आउन नमानेका कपिलदेवलाई राउटे उत्थान प्रतिष्ठान नेपालकी अध्यक्ष सत्यदेवी खड्काले जिम्मेवारी लिएर काठमाडौं ल्याएकी हुन् । 

खड्काले भनिन्, “मलाई सबै राउटे समुदायले भान्जी बनाएका छन् र यतिसम्म विश्वास गरे । तर, काठमाडौं लगेर कपिल निको नभए तिमीलाई पनि मार्छौं भनेका छन् । त्यो कुरामा पनि मैले सहमति जनाएकी छु ।” 

घरेलु उपचारका क्रममा आगोले पोलेको ठाउँमा पात टाँस्दै गएकाले अहिले उनको शरीरको घाउमा कुहिएको पात रहेको खड्काले जानकारी दिइन् । “अवस्था कस्तो छ, डाक्टरले हेरेपछि मात्र थाहा हुन्छ,” उनले भनिन् । खड्काका अनुुसार बिहीबार अस्पताल भर्ना गरिएका कपिलको उपचार शुक्रबारदेखि मात्र सुरु हुनेछ । कपिलसँगै उनका बुबा वीरबहादुर र अन्य केही राउटेहरू काठमाडौं आएका छन् ।

तस्बिर : सरिता खड्का