काठमाडौं । ११ मार्च सन् २०१७ मा छत्तीसगढको सुकुमामा भएको नक्सली हमलामा ज्यान गुमाएका १२ जना सीआरपीएफका परिवारलाई बलिउड स्टार अक्षय कुमारले आर्थिक सहायता गरेका छन् ।
अक्षयले ज्यान गुमाएका सैनिकको परिवार ९ लाख भारतीय रुपैयाँका दरले सहयोग गरेका हुन् । उनले जम्मा १ करोड आठ लाख रुपैयाँको आर्थिक सहयोग गरेका छन् । उनको यो सहयोगलाई सर्वसाधारण र उनका फ्यानले प्रशंसा गरेका छन् ।
सहयोगप्रति भारतीय गृहमन्त्री राजनाथ सिंहले अक्षय कुमारलाई धन्यवाद दिँदै उनको यो कदमलाई प्रशंसा गरेका छन् । गृहमन्त्री सिंहले अक्षयको यो कदमले अरूलाई समेत पीडित परिवारलाई सहयोग गर्न उत्प्रेरणा दिएको बताएका छन् ।
अक्षय कुमारले बिहीबार सबै परिवारको बैंक खातामा ९ लाख रुपैयाँको दरले रकम सहायता गरेका हुन् । सीआरपीएफले समेत विज्ञप्ति जारी गर्दै अक्षय कुमारले देश र सीआरपीएफप्रति राष्ट्रभक्ति र समर्पण देखाएको उल्लेख गरेको छ ।
