काठमाडौं । विश्व नम्बर एक एन्डी मर्रे अष्ट्रेलियन ओपन टेनिसको चौथो चरणमा प्रवेश गरेका छन् । शुक्रबार भएको तेस्रो चरणको खेलमा अमेरिकन खेलाडी साम क्वारीलाई पराजित गर्दै बेलायती मर्रे वर्षको पहिलो ग्रान्डस्लाम टेनिसको चौथो चरणमा पुगेका हुन् ।

मेलबर्नपार्कमा भएको खेलमा २९ वर्षिय मर्रेले ३२ औं बरियताका अमेरिकन साम क्वारीलाई ६–४, ६–२ र ६–४ ले पराजित गरे । रियो ओलम्पिकमा स्वर्ण बिजेता मर्रेले अब चौथो चरणमा जर्मनीका मिशा जेबरेभको सामना गर्ने छन् ।

अष्ट्रेलियन ओपन अन्तर्गत महिलातर्फ साबिकको बिजेता एंजेलिक कर्बर अन्तिम १६ मा प्रवेश गरेकी छिन् । शीर्ष बरियताका जर्मन खेलाडी कर्बरले चेक रिपब्लिककी क्रिस्टिना प्लिस्कोभालाई ६–० र ६–४ ले पराजित गरिन् । अब कर्बरले अन्तिम १६ मा अमेरिकन खेलाडी कोको भान्डीवेगको सामना गर्ने छिन् ।