काठमाडौँ । सूर्यकुमार क्षेत्री प्रथम अन्तर मिडिया राष्ट्रिय फुटसल प्रतियोगिता साउनको दोस्रो हप्ता हुने भएको छ । गोलपोष्ट स्पोट्र्स एण्ड ट्रेनिङ सेन्टर भैंसेपाटीले शनिबार एक पत्रकार सम्मेलन गरी स्व. पत्रकार क्षेत्रीको स्मृतिमा प्रतियोगिता आयोजना गर्न लागेको जानकारी दिएको हो ।

प्रतियोगिता साउन १० देखि १२ गतेसम्म  गोलपोष्ट फुटसल मैदान भैंसेपाटीमा हुने छ । पत्रकार क्षेत्रीका छोराको पढाइका लागि सहयोगार्थ प्रतियोगिता आयोजना गर्न लागेको आयोजकले जनाएको छ । सेन्टरका प्रबन्ध निर्देशक केशव थापाका अनुसार खेल क्षेत्रको विकाससँगै पत्रकार क्षेत्रीका छोराको उज्जवल भविष्यका लागि केहि सहयोग गर्ने उदेश्यका साथ आयोजना गर्न लागिएको जानकारी दिए । नेपाल प्रेस युनियनका सचिव रहेका पत्रकार क्षेत्रीको दुई महिनाअघि ब्रेन ट्युमरका कारण निधन भएको थियो ।

प्रतियोगितामा प्रथम हुने टिमले २५ हजार, दोस्रो हुनेले १५ र तेस्रो हुने टिमले १० हजार रुपैयाँ नगद पुरस्कार पाउने आयोजकले जनाएको छ । प्रतियोगितामा मिडिया हाउसका कर्मचारीबाहेक अन्य खेलाडीले सहभागिता जनाउने पाउने छैनन् । तीन दिने प्रतियोगिता सहभागी टिमको उपस्थिति हेरेर लिगकम वा नकआउट पद्दति अनुसार खेलाइने छ ।

प्रतियोगितामा सहभागी हुने टिमले दुई हजार प्रवेश शुल्क तिर्नुपर्ने आयोजकले जनाएको छ । प्रवेश फारम नेपाल खेलकुद पत्रकार मञ्चको त्रिपुरेश्वरस्थित कार्यालय र गोलपोष्टको कार्यालय भैंसेपाटीमा पाइने  छ ।