काठमाडौं । संसद्को सबैभन्दा ठुलो दल नेपाली कांग्रेस सरकारमा माओवादीको पुच्छर भएको भन्दै रामचन्द्र पौडेल पक्षधरले केन्द्रिय समितिको बैठक बोलाउन माग गरेका छन् । संविधान संशोधन, स्थानीय निकायको निर्वाचन र सरकार सञ्चालनका बारेमा पार्टीको आधिकारिक धारणा बनाउनुपर्ने भए पनि अहिलेसम्म नबनेको, पार्टी माओवादीको पिछलग्गु बनेको आरोप पौडेल पक्षधर नेताको छ ।

“पार्टीमा संस्थागत निर्णय हुन छाड्यो,” पौडेलको भनाई उधृत गर्दै स्रोतले भन्यो,“पार्टी माओवादीको पिछलग्गु भयो । केन्द्रिय समितिको बैठकमा यसबारेमा छलफल हुनुपर्छ ।

पौडेल समूहका नेताहरुको आइतबार छुट्टै बसेको बैठकले यस्तो निष्कर्ष निकालेको हो ।

संविधान संशोधन, स्थानीय संरचना र सरकार सञ्चालनमा पार्टीको धारणा बनाउन केन्द्रीय समितिको बैठक बोलाउन माग गरिएको नेता जीवन परियारले जानकारी दिए ।

बैठकमा आसन्न तरुण दलको महाधिवेशन र पार्टीबाट प्रतिनिधित्व हुने राज्यमन्त्रीको छनोट लगायत समसामयिक विषयमा समेत छलफल भएको थियो ।

“कांग्रेस संसद्को सबैभन्दा ठुलो पार्टी हो,” कांग्रेस नेता परियारले बाह्रखरीसँग भने,“अहिलेको राजनीतिक कसरी अघि बढेको छ भन्ने बारेमा समेत पार्टीमा छलफल हुन छाड्यो ।” बैठकमा सरकार सञ्चालन, पार्टीका गतिविधि, भ्रातृ संस्थाको निर्वाचन लगायतका विषयमा पनि समीक्षा भएको थियो ।