काठमाडौं । माओवादी केन्द्रका नेता नारायणकाजी श्रेष्ठले पछिल्लो समय नयाँ शक्तिका संयोजक डा। बाबुराम भट्टराईप्रति जनतामा नकारात्मक छाप परेको भन्दै आगामी मंसिर १० गते हुने प्रतिनिधिसभाको चुनावमा आफूले गोरखा क्षेत्र नम्बर २ जित्ने दावी गरेका छन् ।
नेता श्रेष्ठले बाबुरामको ढुलमुले बानीका कारण गोरखाका जनताले उनलाई विश्वास नगर्ने र आफूले क्षेत्र नम्बर २ मा चुनाव जित्ने बताएका हुन् । बाह्रखरीसँग कुरा गर्दै नेता श्रेष्ठले भने, "बाबुरामजीको विश्वासनियता नै छैन, जनताले के विश्वास गर्ने ? पहिला माओवादी छोडेर नयाँ शक्ति बनाउँछु भन्दै जानुभयो, त्यसको केही वर्ष नबित्दै कम्युनिष्ट शक्ति बनाउनुपर्छ भनेर वाम गठबन्धनमा जोडिन आउनुभयो, फेरि केही हप्ता नहुँदै आफ्नै चुनाव चिन्ह लिएर लड्छु भन्नुभयो । अनि फेरि कांग्रेससँग तालमेल गर्छु भन्नुभयो यस्तो ढुलुमुले बानीले जनतामा के विश्वास रहन्छ ?"
गोरखा बाबुरामको बिर्ता नभएको टिप्पणी गर्दै नेता श्रेष्ठले आफूले पनि गोरखा क्षेत्र नम्बर २ नछाडेको स्पष्ट पारे । उनले अगाडि भने, "बाबुरामजीले गोरखा २ बाट चुनाव लडेको पहिलो पटक हो । सधैं गोरखाबाट चुनाव लड्नलाई उहाँको बिर्ता हो ? मैले चाहिँ गोरखाबाट चुनाव लड्न हुँदैन ? पार्टीको भोट ७ हजार भएपनि गोरखा २ बाबुरामलाई दिनुपर्छ भन्ने कुरा कतै लेखेको छ ?"
आफूहरुले भट्टराईलाई जताबाट भएपनि चुनाव जिताएर संसद्मा लैजाने बताएको तर नमानेको जिकिर पनि उनले गरे । उनले अगाडि थपे, "उहाँलाई हामीले समानुपातिक गराएर भएपनि संसद्मा ल्याउने भनेका थियौं, त्यति कुरा त मान्नु पर्यो नि ।"
असोज १७ गते एमाले र माओवादीबीचको वाम गठबन्धनमा नयाँ शक्ति पनि जोडिन पुगेको थियो । त्यसको केही हप्ता नबिँत्दै नयाँ शक्तिले आगामी चुनावको लागि गठबन्धनसँग १५ प्रतिशत सिट मागेको थियो । गठबन्धनले नयाँ शक्तिलाई १५ सिट दिन नसक्ने र माओवादी केन्द्रले गोरखा क्षेत्र नम्बर २ बाबुरामलाई नछोड्ने भएपछि नयाँ शक्ति गठबन्धनबाट बाहिरिएको थियो ।
गठबन्धनबाट बाहिरिएपछि नयाँ शक्तिले गोरखा क्षेत्र नम्बर १ र २ मा चुनावी तालमेल गर्ने भएको छ । गोरखा १ मा नयाँ शक्तिले नेपाली कांग्रेसलाई सहयोग गर्ने र २ मा नयाँ शक्तिलाई कांग्रेसले सहयोग गर्ने भएको छ ।
तस्बिर : नारायणकाजीको फेसबुक पेज
