काठमाडौं । सरकारले स्थानीय तह तेस्रो चरणको निर्वाचनका लागि पाँच दिन सार्वजनिक विदा दिने भएको छ ।
सोमबार बसेको मन्त्रिपरिषद बैठकले असोज २ गते हुने स्थानीय तह तेस्रो चरणको निर्वाचनका लागि ५ दिन सार्वजनिक विदा दिने निर्णय गरेको हो । असोज २ गते प्रदेश नम्बर २ अन्तगतको १ सय ३६ वटा स्थानीय तहको निर्वाचन हुँदैछ । सोही निर्वाचनका लागि आगामी भदौ ३० गतेदेखि असोज ३ गतेसम्म ५ दिन सार्वजनिक विदा दिने निर्णय लिइएको सरकारका प्रवक्ता एवम् सूचना तथा संचारमन्त्री मोहनबहादुर बस्नेतले जानकारी दिए । बैठकले प्रधानमन्त्री शेरबहादुर देउवाको संयुक्त राष्ट्र संघको ७२ औं महा सभामा भाग लिन जाने प्रस्ताव पनि स्वीकृत गरेको छ ।
सरकारले राष्ट्रपति र उपराष्ट्रपति निर्वाचनका लागि व्यवस्था गर्न बनेको विधेयक संसदमा पेश गर्ने निर्णय पनि गरेको छ । त्यसैगरी विदेशमा रहेका नेपाली नागरिकका सन्तानलाई पनि कम्तिमा चार वर्षका लागि राहदानी उपलब्ध गराउने निर्णय पनि गरिएको सरकारका प्रवक्ता एवम् सूचना तथा संचारमन्त्री बस्नेतले बताए ।
बैठकले भूकम्पपछिको पुर्ननिर्माणका लागि विश्व बैंकले दाता संयुक्त कोषमार्फत् उपलब्ध गराउन लागेको १ अरव ५ करोड रुपैयाँ अनुदान पनि स्वीकृत गरेको छ ।
त्यसैगरी सरकारले प्रधानमन्त्री शेरबहादुर देउवाको आर्थिक सल्लाहकारमा ज्ञानचन्द्र आचार्यलाई नियुक्त गर्ने निर्णय पनि गरेको छ । अधिकार सम्पन्न बागमति सभ्यता एकीकृत विकास समितिको कार्यकारी अध्यक्षमा नरेन्द्रराज बस्नेतलाई नियुक्त पनि गरिएको छ ।
