काठमाडौं । सांसदहरुले सुन तस्करी नियन्त्रण गर्न नसकेकोमा सरकारको चर्को आलोचना गरेका छन् । प्रमुख प्रतिपक्ष नेकपा एमालेका सांसद हर्कबोल राईले सुन तस्करीमा माथिल्लो निकायकै संलग्नता रहने गरेकाले सरकार डराईरहेको आरोप लगाए । व्यवस्थापिका संसद अन्तर्गतको सुशासन तथा अनुगमन समितिको आइतबारको बैठकमा उनले सुन तस्करी नियन्त्रण गर्न सरकार र सुरक्षा निकाय गम्भिर नदेखिएकोमा आपत्ति पनि जनाए । 

राष्ट्रिय जनता पार्टी, नेपालका सांसद अकवाल अहमद साहले मुलुकलाई सुशासन दिन सरकार पूर्णतः असफल भएको आरोप लगाए । सांसद साहले सुन तस्करी नियन्त्रणका लागि भन्सार र सुरक्षा निकायबीच आवश्यक समन्वयन गराउन पनि सरकारलाई सचेत गराए । 

नेपाल परिवार दलकी सांसद मिलन राजवंशीले ठूल्ठूला नाकाबाट सुन तस्करी हुँदा समेत त्यसलाई नियन्त्रण गर्न सरकार गम्भिर नदेखिएको आरोप लगाइन् । उनले सिमा नाकामा कडा चेकजाँचको व्यवस्था गरी सुन तस्करी नियन्यण गर्न पनि सरकारसँग माग गरिन् । 

पछिल्लो पटक गत सोमबार काठमाडौंको क्षेत्रपाटीबाट ८८ अबैध सुन बरामद भएको थियो । सांसदहरुले सोही घटनामा संलग्न तस्करहरुलाई नियन्त्रण लिई कार्वाही गर्न सरकारलाई दवाव दिँदै आएका छन् ।