काठमाडौं । ‘गोल्डेन गर्ल’को उपमा पाएकी सन्तोषी श्रेष्ठ र मुशेश पलले शुक्रबार राष्ट्रिय एथलेटिक्स प्रतियोगिताको १५०० मिटर दौडमा स्वर्ण पदक जितेकी छन् ।
नेपाल एथलेटिक्स संघले त्रिपुरेश्वरस्थित दशरथ रंगशालामा आयोजना गरेको प्रतियोगिताको ४४औँ संस्करणमा वाग्मती प्रदेशकी सन्तोषीले १५०० मिटर दौडको महिला स्पर्धामा स्वर्ण पदक जितेकी हुन् । त्रिभुवन आर्मी क्लबका मुकेशले सोही स्पर्धाको पुरुषफर्त स्वर्ण पदक जिते ।
दक्षिण एसियाली खेलकुद (साग)मा सन्तोषीले निर्धारित दुरी ४ मिनेट ४२.८ सेकेण्डमा पूरा गरिन् । त्रिभुवन आर्मीकी पूर्णलक्ष्मी न्यौपाने दोस्रो स्थानमा रहिन् । पूर्णलक्ष्मीले ४ मिनेट ५८.२ सेकेन्डमा दुरी पार गरेकी हुन् । ५ मिनेट ०५.९ सेकेन्डमा दुरी पार गरेकी एपीएफकी आशा राउत तेस्रो भइन् ।
पाँच मिनेट १४.६ सेकेण्डमा दुरी पार गर्न सफल आर्मीकी राधिका श्रेष्ठ चौँथो, ५ मिनेट ३१.८ मिनेटमा दुरी पार गरेकी कर्णालीकी विमला कार्की पाँचौँ र ५ मिनेट ५२.३ मिनेटमा दुरी पार गरेकी सुदूरपश्चिमकी माया साउँद छैटौँ स्थान हासिल गरिन् ।
पुरुषतर्फ मुकेशले निर्धारित दुरी ३ मिनेट ५६.७ सेकेन्डमा दुरी पूरा गर्दै स्वर्ण पदक जितेका हुन् । एपीएफका अजित यादवले ३ मिनेट ५८.८ सेकेन्डसहित रजत पदक हात पारे । चार मिनेट ०१.८ सेकेन्डमा दुरी पार गर्ने आर्मीका सुनिल सुनारले काश्य पदक जिते ।
चार मिनेट ०४.७ मिनेटमा दुरी पार गर्ने नेपाल पुलिसका नागेश्वर अहिर चौँथो भए । गण्डकी प्रदेशका दिनेश बोगटी पाँचौँ भए । दिनेशले ४ मिनेट १३.६ सेकेण्डमा दुरी पार गरेका थिए । वाग्मतीका विकेश घिमिरेले ४ मिनेट २१.७ सेकेन्डमा दुरी पार गर्दै छैटौँ स्थान हासिल गरे ।
प्रतियोगितामा ३१ स्वर्णका लागि प्रतिस्पर्धा भइरहेको छ । दुई दिनसम्म चल्ने प्रतियोगितामा सात प्रदेश र तीन विभागीय टोलीका २४० खेलाडीले प्रतिस्पर्धा गरेका छन् ।
