काठमाडौं । नेकपा (एकीकृत समाजवादी)का मन्त्रीहरूको हेरफेरको विषय थप पेचिलो बनेको छ । पार्टीबाट सरकारमा गएका मन्त्रीहरूसहितका १० सांसदले मन्त्री हेरफेरमा असन्तुष्टि जनाएर संसदीय दलको बैठक माग गरेका छन् । 

उनीहरूको मागबारे आजको पोलिटब्युरो कमिटीको बैठकमा छलफल नभएको प्रचार विभाग प्रमुख जगन्नाथ खतिवडाले जानकारी दिए । उनले पार्टीको निर्णयमा हेरफेर गर्नेगरी सांसदहरूले राखेका बुँदामा छलफल नहुने समेत बताए । 

मन्त्री हेरफेरबारे प्रधानमन्त्री शेरबहादुर देउवाले आज पनि नभ्याएको जानकारी गराएको खतिवडाले बताए । देउवाले नयाँ मन्त्रीहरूको सपथ भोलि गराउनसक्ने उनले बताए । 

“पार्टीले निर्णय गरेपछि राजीनामा नगरेर अल्झिएर बसेको हुनेले वा त प्रधानमन्त्रीजीले तत्काल अर्को शपथ ग्रहण गराउने तयारी गर्नुभएको छ,” पोलिब्युरो बैठकपछि खतिवडाले भने, “उहाँले हिजो पनि तयारी गर्नुभएको थियो । हिजो भ्याइनँ भन्नुभो । आज भ्याइनँ भन्नुभो । अब भोलि गर्नुहोला ।”