काठमाडौं । नेकपा एकीकृत समाजवादीका नेता मेटमणि चौधरीले मन्त्री हेरफेरमा नेकपा माओवादी केन्द्रका अध्यक्ष पुष्पकमल दाहाल प्रचण्डले भूमिका खेलेको आरोप लगाएका छन् । 

पार्टी कार्यालयमा सञ्चारकर्मीहरूसँग कुराकानी गर्दै उनले माओवादीभित्रको प्रेसर धान्न गाह्रो भएर प्रचण्डले पर सार्न भूमिका खेलिरहेका बताए । “सिफारिस कार्यान्वयन गर्ने जिम्मा प्रधानमन्त्रीको हो । उहाँलाई प्रभाव पार्ने काम कमरेड प्रचण्डको हो । एकीकृत समाजवादीका मन्त्रीलाई शपथ खुवाउँदा उहाँको पार्टीमा पनि प्रेसर छ । प्रेसर धान्न गाह्रो होला भनेर एक–दुई दिन भनिरहनुभएको छ,” उनले भने । 

उनले जेठ २२ गते गरेको सिफारिस कार्यान्वयन नगर्नु प्रधानमन्त्री शेरबहादुर देउवाको कमजोरी भएको पनि बताए । चौधरीले ६ महिना मात्रै मन्त्री हुन्छौँ भनेर गएकाले अहिले छोड्न अप्ठ्यारो मान्नुनपर्ने समेत बताए । 

उनले अहिले पार्टीबाट सरकारमा रहेका मन्त्रीहरूमा नैतिकता नदेखिएको संकेतसमेत गरे । “यदी कोही नैतिकवान् मन्त्री हो भने पार्टीले २२ गते निर्णय गर्‍यो । २२ गते नै राजीनामा दिनुपर्थ्यो ,”उनले भने ।

चौधरीलाई एकीकृत समाजवादीले सहरी विकासमन्त्रीमा सिफारिस गरेको छ ।