काठमाडौं । आइतबार हैजा संक्रमण पुष्टि भएका बागबजारका दुई महिलामा धारा र ट्युवबेलको पानीबाट हैजा संक्रमण भएको पुष्टि भएको छ ।

काठमाडौंको बागबजारबाट उनीहरूले पिउने पानीको नमुना परीक्षण गर्दा ‘फिकल इकोली’नामक जीवाणु भेटिएको स्वास्थ्य कार्यालय काठमाडौंका प्रमुख वसन्त अधिकारीले जानकारी दिए । फिकल इकोली मानिसको दिसामा रहने संक्रामक जिवाणु हो ।

अधिकारीकाअनुसार उनीहरूले धारा र ट्युवबेलबाट आएको पानी संकलन गरेर राख्ने गरेको र नउमालि पिउने गरेको पाइएको छ । आइतबार हैजा संक्रमण पुष्टि भएका उनीहरू एकै परिवारका दिदीबहिनी हुन् ।

हैजा देखिएका अन्य क्षेत्रको पनि पानीको नमुना परीक्षण भइरहेको अधिकारीले बताए । पानीबाट हैजा संक्रमण भएको पुष्टि भएपछि स्वास्थ्य तथा जनसंख्या मन्त्रालयले पानी उमालेर मात्रै पिउन र जथाभाबी खानेकुरा नखान अनुरोध गरेको छ ।