काठमाडौं । अर्थमन्त्री जनार्दन शर्माले निजी क्षेत्रलाई विश्वासमा लिने बजेट रहेको दाबी गरेका छन् । उनले निजी क्षेत्रलाई उत्पादनमा उत्साहित बनाउने उनीहरूको माग सम्बोधन गरेर बजेट ल्याएको दाबी गरे । 

“व्यापार हैन, निजी क्षेत्रलाई उत्पादनमा उत्साहित गर्ने हाम्रो नीति हो । ७० प्रतिशत योगदान दिने निजी क्षेत्रलाई विश्वास लिने बजेट ल्याएका छौँ,” सोमबार मन्त्रालयमा आयोजित पत्रकार सम्मेलनमा अर्थमन्त्री शर्माले भने, “निर्यातमा नगद अनुदान र विजुलीमा छुट सिमेन्ट उद्योगलाई टार्गेट गरेका छौं । अब सिमेन्ट निर्यात गर्ने लक्ष्य हो ।” 

अब अन्तर्राष्ट्रिय बजारमा निकासी किन नगर्ने भनेर निर्यात टार्गेट सिमेन्ट रहेको उनले बताए । त्यसका लागि निर्यातमा अनुदान र वार्षिक १० करोडभमन्दा बढी बिजुली खपत गर्नेलाई महसुल छुट गर्ने घोषणा गरेको उनले बताए । 

“बजेट आयात प्रतिस्थापन होस् र निर्यातमा केन्द्रित गर्न खोजेका छौं,” उनले भने । यस्तै ५ खर्बको लघुवित्त कोषमार्फत उत्पादन क्षेत्रमा नै कर्जा दिने व्यवस्था गर्न खोजिएको उनले बताए ।

“पाँच खर्बको लघुवित्त कोषमार्फत उत्पादनमा सहभागी हुने किसान, स्टार्टअप, साना व्यवसाय गर्नेलाई घरदैलोमा ऋण दिने भनेका छौं । लघुवित्तलाई प्राथमिकता दिएर वित्तिय पहुँच घर दैलोमा लैजाने हो,” उनले भने, “बैंकले मझौला र ठूला व्यवसायका लागि लगानी गर्ने हो । अब घर दैलो र पेशा व्यवसाय गर्ने ठाउँमा नै ऋण लघुवित्तमार्फत लगानी हुन्छ ।” 

उनले आफूले ल्याएको बजेटले पूर्वाधार निर्माणलाई समयमा सम्पन्न  गर्नुपर्छ भनेर टार्गेट लिएको दाबी गरे । 

सबै पूर्वाधार सरकारले गर्न सक्दैन भनेर केही दु्रतमार्ग निजी क्षेत्रलाई दिने कुरा गरेको भन्दै उनले सपना देख्नुपर्ने र सपना नदेखी केही नहुेने स्पष्ट पारे । बजेटमा काठमाडौं–पालुङ–नारायणगढ, नारायणगढ–रामपुर–बुटवल र नारायणगढ–रामपुर–पोखर द्रुतमार्गको प्रस्ताव गरिएको छ ।