काठमाडौं । धरानका व्यावसायिक गल्फर शुक्रबहादुर राईले अन्तिम दिन ३–अन्डर ६९ को स्कोर गर्नुका साथै समग्रमा १९–अन्डर २६९ स्कोर गर्दै सूर्य नेपाल गल्फ च्याम्पियनसिपको उपाधि जित्न सफल भएका छन् । जितसँगै शुक्रबहादुर नेपालको नम्बर एक गल्फर बनेका छन् ।
सूर्य नेपाल गल्फ टुर २०२१/२२ को अन्तिम प्रतियोगितामा शुक्रबहादुरले करियरकै उत्कृष्ट स्कोर निकालेका हुन् । शुक्रले धरानकै निरज तामाङलाई ६ स्ट्रोकले पछाडि पारेका हुन् । शुक्रको करियरमा यो सातौँ उपाधि हो । उपाधि विजेता शुक्रले दुई लाख ५० हजार रुपैयाँ पुरस्कार जितेका छन् ।
शुक्रले यो सिजनको कुल आठमध्ये पाँच प्रतियोगिता मात्र खेलेका थिए । खेलेका पाँच प्रतियोगितामध्ये शुक्रले तीनको उपाधि जितेका थिए । शुक्रले यसअघि सेन्ट्रल ओपन, इस्ट्रन ओपनको उपाधि जितेका हुन् । शुक्रले जारी सिजन सर्वाधिक ६ लाख ६३ हजार ५०० रुपैयाँ नगद पुरस्कार जित्न सफल भए ।
च्याम्पियन शुक्रले प्रतियोगिताको चौँथो तथा अन्तिम दिन आज (बिहीबार) पहिलो होलमा बोगी खेलेका थिए । तेस्रो र सातौँ होलको बर्डी खेलेका शुक्रले फ्रन्ट नाइनमा १–अन्डर ३५ स्कोरमा सकाएका थिए । त्यसपछि ११, १२ र १८औँ होलमा एक÷एक सट बचाएका शुक्रले १४औँ होलमा बोगी खेलेपछि ब्याक नाइनमा २–अन्डर ३४ स्कोर गरेका थिए । शुक्रले पहिलो दिन ३–अन्डर ६९, दोस्रो दिन ७–अन्डर ६५, तेस्रो दिन ६–अन्डर ६६ स्कोर गरेका थिए ।
शुक्र पहिलो दिन पाँचौँ स्थानमा थिए भने दोस्रो दिन दोस्रो स्थानमा उक्लिएका थिए । तेस्रो दिन शीर्ष स्थानमा उक्लिएका शुक्रले अन्तिम दिन पनि अग्रतालाई कायम राख्दै उपाधि जित्न सफल भएका हुन् ।
दोस्रो भएका निरजले अन्तिम दिन २–ओभर ७४ स्कोर गरे । समग्रमा १३–अन्डर २७५ स्कोर गरेका निरजले अन्तिम दिन फ्रन्ट नाइनमा इभन–पार ३६ स्कोर गरे । उनले तेस्रो र सातौँ होलमा बर्डी प्रहार गरे भने चौँथो र पाँचौँ होलमा एक–एक सट खेर फाले । त्यसपछि १४ र १५औँ होलको बोगी खेल्दा निरजले ब्याक नाइन २–ओभर ३८ स्कोरमा सकाए ।
समग्रमा १२–अन्डर २७६ स्कोर गरेका भुवन नगरकोटी तेस्रो स्थानमा रहे । यससँगै नम्बर एक गल्फरको स्थान गुमाए । भुवनले अन्तिम दिन २–अन्डर ७० स्कोर गरेका थिए । भुवनले यो सिजन कुल ५ लाख ८० हजार ५०० रुपैयाँ नगद पुरस्कार जितेका छन् । उनी दोस्रो स्थानमा झरेका छन् ।
एमेच्योर वाङचेन ढोन्डुपले समग्रमा ११–अन्डर २७७ स्कोरसहित एमेच्योरतर्फको उपाधि जिते । अन्तिम दिन १–ओभर ७३ स्कोर गरेका वाङचेन समग्रमा भने उनी चौथो भए । अर्का एमेच्योर महेन्द्र फगामी समग्रमा १०–अन्डर २७८ सहित एमेच्योरतर्फ दोस्रो भए । उनले अन्तिम दिन ३–अन्डर ६९ को स्कोर गरे । समग्रमा भने महेन्द्र पाँचौ भए । एमेच्योरतर्फ एकक्षत्र राज गरिरहेको सुबास तामाङले समग्रमा ७–अन्डर २८१ सहित पुर्ण बहादुर शर्मासँग संयुक्त रूपमा छैठौँ स्थान बाँडे । अन्तिम दिन सुबासले ५–अन्डर ६७ र पूर्णले इभन–पार ७२ स्कोर गरे ।
अन्तिम दिन इभन–पार ७२ सहित समग्रमा ५–अन्डर २८३ स्कोर गरेका एमेच्योर आरव डी शाहले आठौँ स्थानमा रहेर प्रतियोगिता सकाए । भुवनकुमार रोक्का र रबि खड्काले समग्रमा ३–अन्डर २८५ स्कोरसहित संयुक्त रूपमा नवौँ स्थान बाँडे । अन्तिम दिन भुवनले २ ओभर ७४ र रबिले १–ओभर ७३ स्कोर गरे । एमेच्योर सद्भाव आचार्यले समग्रमा २–अन्डर २८६ सहित एघारौँ र समग्रमा इभन–पार २८८ स्कोरसहित सूर्यप्रसाद शर्माले १२औँ स्थानमा रहेर प्रतियोगिता सकाए ।
पाँच–ओभर २९३ सहित व्यावसायिकतर्फ १५औँ भएका जयराम श्रेष्ठले तेस्रो स्थानसहित आगामी सिजनको सुरुआत गर्नेछन् ।
चार दिने प्रतियोगितामा ४३ प्रोफेसनल र ११ एमेच्योर सहित ५४ गल्फरले प्रतिस्पर्धा गरेका थिए । नेपाल प्रोफेसनल गल्फर्स संघद्वारा आयोजित प्रतियोगिताको कुल पुरस्कार राशि १४ लाख ६१ हजार रुपैयाँ रहेको थियो । विजयी खेलाडीहरूलाई सूर्य नेपाल प्रालिका मार्केटिङ उपाध्यक्ष दीपरा लहेरी, नेपाल प्रोफेसनल गल्फर्स संघका अध्यक्ष रबिन्द्र मान श्रेष्ठ र नेपाल गल्फ संघका अध्यक्ष टासी घलेले पुरस्कार वितरण गरे ।
