काठमाडौं । डाउन सिन्ड्रोम तथा अटिजम भएका बालबालिकाका लागि छुट्टै विद्यालय निर्माण गर्ने लक्ष्यका साथ राउण्ड टेबल नेपालले विशेष कार्यक्रम गर्ने भएको छ । 

स्कुल फर स्पेसल नाम दिइएको यो परियोजना अन्तर्गत पहिलो चरणमा काठमाडौं उपत्यकामा एक विशेष स्कुल निर्माण गरिनेछ भने डाउन सिन्ड्रोम तथा अटिजम भएका बालबालिकालाई पढाउने जुनसुकै स्कुलको विकास र वृद्धिका लागि विशेष सहयोग समेत गरिने जनाइएको छ ।

आउँदो असार ४ अर्थात् जुन १८, २०२२ को शनिबार राजधानीमा कार्निभल आयोजना हुने जनाइएको छ । ‘जुन वियर कार्निभल’को आयोजना हुने यो कार्यक्रम वियर फेस्टिभल र पारिवारिक कार्निभलको संयुक्त रूप हुनेछ । यस कार्निभलको आयोजनाको लागि होटेल मल्लले निःशुल्क होटल उपलब्ध गराउने जनाइएको छ ।

दि मल्ल होटलकी एसोसिएट डाईरेक्टर अनुस्का मल्लले राउण्ड टेबल नेपालको यस योजनामा सहभागी हुन पाउँदा आफू हर्षित भएको बताउँदै यस कार्यक्रमको सफलताका लागि सबैखाले सहयोग गर्ने प्रतिबद्धता व्यक्त गरिन् ।

डाउन सिन्ड्रोम तथा अटिजम प्रति जनचेतना अभिवृद्धि गर्दै यस्ता फरक क्षमता भएका बालबालिकाको शिक्षा तथा वैयक्तिक विकासमा सहयोगी बन्ने अभिप्रायका साथ राउण्ड टेबलले युवा लक्षित कार्यक्रमको आयोजना गर्ने भएको जनाइएको छ । 

यस कार्यक्रमबाट भएको आम्दानीको शत्प्रतिशत रकम डाउन सिन्ड्रोम तथा अटिजम भएका बालबालिकाको शिक्षामा खर्च गरिने आयोजक संस्थाका शरद केडियाले बताए । डाउन सिन्ड्रोम तथा अटिजम भएका बालबालिकाको शिक्षा र मनोरञ्जनका लागि काम गर्ने बृहत्तर योजनाको यो पहिलो पाइला भएको उनले बताए ।