विराटनगर । झापाको गौरीगन्ज गाउँपालिकामा नेपाली कांग्रेसको तर्फबाट उमेदवार बनेकी फूलवती राजवंशी अध्यक्षमा निर्वाचित भइन् । नेपाल महिला संघ हुँदै पार्टीको तल्लो तहबाट राजनीतिमा उदाएकी उनी अघिल्लो निर्वाचनमा अध्यक्षमा पराजित भएकी थिइन् ।

फूलवती भन्छिन्, “हामी गौरीगन्जमा अब फेरि प्रमुख नेतृत्वमा पुगेका छौँ । जुन विश्वासले मत पाएका छौँ, अब त्यही उत्साहले काम गर्नेछौँ ।”

फूलवतीले गौरीगन्ज अल्पसंख्यक राजवंशी र सन्थाल समुदायको अधिक बसोबास क्षेत्र भएकाले उनीहरूको उत्थान हुने काम गर्ने योजना बुनेको सुनाइन् ।

“मतगणना स्थगन हुँदै फेरि सुरु गर्दा जितिएला कि हारिएला भन्ने द्विविधि थियो । तर, मतदाताले विश्वास गरेर मलाई विजयी गराउनुभयो,” गौरीगन्ज गाउँपालिकाकी उपाध्यक्ष पूजन न्यौपाने कुँवरले भनिन्, “पछि यस्तो परिणाम आयो कि अर्को दलबाट अध्यक्ष पनि महिला नै जित्नुभयो ।”

नेपाली र समाजशास्त्र विषयमा स्नाकोत्तर पूजन यसअघि गाउँपालिका कार्यालयमा सामाजिक परिचालकका रूपमा कार्यरत थिइन् । उक्त पदमा छँदा उनलाई नागरिकसँग जोडिन धेरै सहयोग पुग्यो । त्यसपछि वैदेशिक रोजगारसम्बन्धी परामर्श सेवामा खटिइन् । त्यसबाट पनि समस्यामा परेका सर्वसाधारणसँग जोडिन मद्दत मिल्यो ।

स्थानीय निर्वाचनमा नेकपा (एमाले)ले उनलाई उपाध्यक्षका लागि टिकट दियो । आफूभन्दा दिग्गज उमेदवारलाई हराउँदै पूजन निर्वाचित भइन् । उनी भन्छिन्, “हिजो पनि जनसेवामा थिएँ, अब त झन् जनमत प्राप्त गरेरै त्यो पदमा पुगेकी छु । महिला तथा पिछडिएका सामुदायको उत्थानमा काम गर्ने मेरो योजना छ ।”

मोरङको कानेपोखरी गाउँपालिकाको अध्यक्षमा एमालेकी राजमती इङ्नाम विजयी भइन् । उपाध्यक्षमा उनकै पार्टीका भोलाप्रसाद अधिकारी निर्वाचित भए । कानेपोखरीकी निवर्तमान उपाध्यक्ष समेत रहेकी इङनाम यसअघि आफूले गरेको राम्रो कामबाट विश्वास गरेकाले नै पार्टीले अवसर दिएको बताउँछिन् । उनी भन्छिन्, “महिलाले नेतृत्व नहाँक्ने भन्ने कुरै हुँदैन । अब हामी योजनागत रूपमा आफ्नो कुशल नेतृत्व प्रस्तुत गर्दै अघि बढ्नेछौँ ।”

प्रदेश नम्बर–१ का विभिन्न पालिकाको नेतृत्वमा ६ महिला निर्वाचित भएका छन् । झापाको बिर्तामोड नगरपालिकाको प्रमुखमा एमालेकी पवित्रादेवी महतारा निर्वाचित भएकी छन् । उपप्रमुखमा एमालेकै नगेन्द्रप्रसाद संग्रौला निर्वाचित भए ।

सोलुखुम्बुको लिखुपिके गाउँपालिकाको अध्यक्षमा कांग्रेसकी मीनादेवी कार्की विजयी भइन् । त्यहाँ उपाध्यक्षमा कांग्रेसकै डावाङ लाक्पा शेर्पा निर्वाचित भए ।

यस्तै, खोटाङको हलेसी तुवाचुङ नगरपालिकाको प्रमुखमा कांग्रेसकी विमला राई निर्वाचित भएकी छन् । उपाध्यक्षमा कांग्रेसकै रमेशकुमार राउत विजयी भए । टिकट वितरणकै बेला राईलाई रोक्न खोजिएकामा उनले कांग्रेसको प्रदेश समितिमा भएको छलफलमा आफ्नो प्रस्ट एजेन्डा राखेर नेताहरूलाई प्रभावित बनाएकी थिइन ।

कांग्रेस प्रदेश–१ का कोषाध्यक्ष राजेश गुप्ताले भने, “उहाँलाई टिकट दिने/नदिने भन्ने विषयमा संसदीय समिति पनि द्विविधामा थियो । तर, उहाँको कार्यकौशल र नेतृत्व क्षमताकै कारण पाउनुभयो । पछि निर्वाचन पनि जित्नुभयो ।”

खोटाङको जन्तेढुंगा गाउँपालिकाको अध्यक्षमा सत्ता गठबन्धनका तर्फबाट उमेदवार बनेकी नेकपा (माओवादी केन्द्र)की अरुणादेवी राई निर्वाचित भइन् । कांग्रेसका खेमबहादुर खड्का उपाध्यक्षमा निर्वाचित भए ।