बुटवल ।  रूपन्देहीको तिलोत्तमा नगरपालिकाको मतगणनामा कर्मचारीले धाँधली गरेको भन्दै विवाद भएपछि रोकिएको मतगणना सुचारु गर्न सर्वदलीय बैठक बसिरहेको छ । 

मत परिणाम प्रविष्ट गर्दा निर्वाचन आयोगका कर्मचारीले नेपाली कांग्रेसको १४१ मत हुनुपर्नेमा ११४ र नेकपा (एमाले)को २५९ मत हुनुपर्नेमा २९६ रेकर्डमा चढाएका थिए । त्यसपछि कांग्रेस प्रतिनिधिले विरोध गरेका थिए । विरोधका बिच रोकिएको मतगणना सुचारु गर्नको लागि सर्वदलीय बैठक बसेको नेपाली कांग्रेस रूपन्देही सदस्य कमला पाण्डेले जानकारी दिइन् । 

नेपाली कांग्रेस, माओवादी केन्द्र, नेकपा एकीकृत समाजवादी, जनता समाजवादी पार्टी, राष्ट्रिय जनमोर्चा, राष्ट्रिय जनमुक्ति पार्टी र राष्ट्रिय प्रजातन्त्र पार्टीले पुनः मतगणनाको माग गरेका छन् भने नेकपा एमालेले निर्वाचित भइसकेका वडाहरुको पुन: गणना गर्न नसकिने बताएको छ ।

बैठकमा नेपाली कांग्रेस, नेकपा एमाले, माओवादी केन्द्र, नेकपा एकीकृत समाजवादी, जनता समाजवादी पार्टी, राष्ट्रिय जनमोर्चा, राष्ट्रिय जनमुक्ति पार्टी र राष्ट्रिय प्रजातन्त्र पार्टी सहभागी रहेका छन् । 

निर्वाचन आयोगले पनि मतगणनाको रेकर्ड राख्दा त्रुटि भएको स्वीकार गरिसकेको छ ।

तिलोत्तमाका निर्वाचन अधिकृत माधव लोहनीले कर्मचारीबाट त्रुटि भएको भन्दै कर्मचारीलाई कारवाही गरिने बताएका छन् । 

यसैबीच, आयोगले विज्ञप्ति जारी गरेर मतगणनामा खटिएका कर्मचारीलाई गणनाको हस्ताक्षर गरेर मात्र कम्प्युटरमा विवरण प्रविष्ट गर्न निर्देशन दिएको छ ।