काठमाडौं । रसिद खानले अन्तिम चार बलमा तीन छक्का प्रहार गरेपछि गुजरात टाइटन्सले बुधबार राति इन्डियन प्रिमियर लिग (आईपीएल)मा सनराइजर्स हैदरावादमाथि ५ विकेटको रोमाञ्चक विजय हासिल गरेको छ । 

गुजरातलाई जितका लािग अन्तिम ओभरमा २२ रनको आवश्यकता थियो । क्रिजमा थिए, रसिद खान र राहुल टेबाटिया । खानले ७ बलमा १३ रन बनाएका थिए भने टेवाटियाले १९ बलमा ३३ रन बनाएका थिए । हैदरावादका कप्तान केन विलियम्सनले अन्तिम ओभरका लागि मार्को जनसेनलाई बोलाए । 

अन्तिम ओभरमा जनसेनको पहिलो बलमै टेवाटियाले छक्का प्रहार गरे । दोस्रो बलमा टेवाटियाले एक रनमात्र लिन सके । त्यसपछि स्ट्राइकमा रसिद खान आए । तेस्रो बलको सामना गर्दा रसिदले छक्का हाने । चौथो बल डट खेले । त्यसपछि खानले लगातार दुई छक्का हानेपछि गुजरातले १९६ रनको लक्ष्य पाँच विकेट गुमाएर पूरा गर्यो । 

त्यसअघि मुम्बईको वाङ्खडे रंगशालामा टस हारेर ब्याटिङका लागि निम्त्याइएको हैदरवादले निर्धारित २० ओभरमा ६ विकेट गुमाएर १९५ रन बनाएको थियो । 

जितसँगै आठ खेलबाट १२ अंक जोडेको गुजरात पुनः शीर्ष स्थानमा उक्लिएको छ । समान खेलबाट १२ अंक जोडेको राजस्थान रोयल्स दोस्रो स्थानमा छ । हैदरावाद तेस्रो स्थानमा छ । हैदरावादको १० अंक छ । लखनउ सुपर जायन्ट र रोयल च्यालेन्जर्स बैंगलोरको पनि १० अंक नै छ । 

हैदरावादका लागि ओपनर अभिशेक शर्माले ६५, एइडेन मारक्रमले ५६, शशांक सिंहले २५ र राहुल त्रिपाठीले १६ रन बनाए । गुजरातका मोहम्मद शामीले तीन विकेट लिए । यस दयाल र अल्जारी जोसेफले एक एक विकेट लिए । 

गुजरातका रसिद खानले ११ बलमा ४ छक्कासहित अविजित ३१ रन बनाए । टेवाटियाले २१ बलमा चार चौका र दुई छक्कासहित अविजित ४० रन बनाए । त्यसअघि ओपनर ऋदिमन शाहले ३८ बलमा ११ चौका र एक छक्कासहित ६८ रन बनाए । शुबमन गिलले २२, डेविड मिल्नरले १७ र कप्तान हार्दिक पाण्डेयले १० रन बनाए । 

हैदरावादका उमरान मलिकले पाँच विकेट लिए । उनले चार ओभरमा २५ रन दिएर पाँच विकेट लिएका हुन् । जारी सिजन एकै इनिङ्समा पाँच विकेट लिने मलिक दोस्रो खेलाडी बने । यसअघि राजस्थान रोयल्सका युजभेन्द्र चाहलले पाँच विकेट लिएका थिए ।