नेपालगञ्ज । यौनिक तथा अल्पसङ्ख्यक, अपाङ्ग, दलित, ज्येष्ठ नागरिक, मुस्लिम तथा मधेसी संवाद समूहले आसन्न स्थानीय तहको निर्वाचनमा मताधिकारबाट वञ्चित नगर्न आग्रह गरेको छ । 

 सोमबार यहाँ आयोजना गरेको संवादमा निर्वाचनलाई शान्तिपूर्ण, स्वच्छ, मर्यादित, विश्वसनीय र अर्थपूर्ण सहभागितासहित सफल बनाउन समन्वय र सहकार्य आवश्यक भएकोमा जोडसमेत दिइएको छ । 

यौनिक तथा अल्पसङ्ख्यक शीला गुरुङले बाँकेमा तेस्रो लिंगीको सङ्ख्या ५०० भन्दा बढी रहे पनि पहिचानसहितको नागरिकता नभएका कारण महिला या पुरुषकै लाइनमा लागेर मतदान गर्नुपर्ने अवस्था रहेको बताइन् । 

लोपोन्मुख समुदायका सब्बिर किङ्घरियाले सीमान्तकृत समुदायमा मतदाता शिक्षा नपुगेको जनाउँदै मतको महत्वबारे पनि प्रकाश पार्न आवश्यक रहेको उल्लेख गरे । राष्ट्रिय अपाङ्ग महासङ्घका सचिव भावुकजङ्ग थापाले अपागङ्ता भएका व्यक्तिका लागि विद्युतीय मेसिनमार्फत मतदानको व्यवस्था गरिनुपर्ने सुझाव दिए ।  

अधिकारकर्मी प्रकाश उपाध्यायले मतदाता शिक्षा प्रभावकारी हुन नसकेको जनाउँदै मतदान गर्ने लाइन, खानेपानी, शौचालयलगायतमा विशेष ध्यान दिनुपर्ने आवश्यक्ता औँल्याए । 

राष्ट्रिय मानवअधिकार आयोग नेपालगञ्जका प्रमुख झङ्कर रावलले अपाङ्ग, ज्येष्ठ नागरिकलगायतका सबै मतदातालाई सुरक्षित मतदान गर्ने अधिकार सुनिश्चिता गरिनुपर्नेमा जोड दिए । 

जिल्ला प्रशासन कार्यालय बाँकेका प्रशासकीय अधिकृत हरिशचन्द्र शर्माले मतदानमा सुरक्षा थ्रेट नरहेको, मतदान केन्द्रको नियमित स्थलगत अवलोकनसँगै सुरक्षा विश्लेषणसहितको तयारी रहेको जानकारी दिए ।  

मतदान केन्द्रलाई मतदातामैत्री बनाउन आवश्यक समन्वय, संवाद र सहकार्यका लागि सहभागीले प्रतिबद्धता जनाएका छन् । रासस