काठमाडौं । एमेच्योर सुभाष तामाङले शुक्रबार सूर्य नेपाल वेस्टर्न ओपन गल्फको उपाधि जितेका छन् । सूर्य नेपाल गल्फ टुर २०२१–२२ सिजनको पाँचौँ इभेन्टमा प्रो गल्फर जयराम श्रेष्ठलाई ४ स्ट्रोकले पछि पार्दै सुभाषले उपाधि जितेका हुन् । 

१३औँ दक्षिण एसियाली खेलकुद (साग)मा दुई स्वर्ण पदक जित्न सफल सुभाषले पहिलो पटक सूर्य नेपाल वेस्टर्न ओपनको उपाधि जितेका हुन् । सुभाषको यो दोस्रो टुर इभेन्ट उपाधि हो । यसअघि उनले सन् २०१९ मा सूर्य नेपाल च्यालेन्जको उपाधि जितेका थिए ।

पोखरको हिमालयन गल्फ कोर्समा सुभाषले अन्तिम दिन १ ओभर ६९ स्कोरसहित समग्रमा इभन पार २०४ स्कोर जोडेका थिए । यससँगै उनले एमेच्योर र समग्रमा टुरसहित दुई उपाधि उचाले ।

दोस्रो भएका जयरामले तेस्रो दिन ४ ओभर ७२ स्कोरसहित समग्रमा ४ ओभर २०८ स्कोर बनाए । समग्रमा दोस्रो भएका जयरामले प्रो खेलाडीतर्फ भने पहिलो हुँदै १ लाख ३५ हजार रुपैयाँ हासिल गरे । समग्रमा तेस्रो स्थान हासिल गर्ने क्रममा धनबहादुर थापा, निरज तामाङ र रामे मगरले ७ ओभर २११ स्कोरसहित जनही ६८ हजार ८३३ रुपैयाँ नगद पुरस्कार जिते ।

स्थानीय एमेच्योर अजित विक समग्रमा छैटौँ तथा एमेच्योरमा दोस्रो भए । उनले तेस्रो दिन ३ ओभर ७१ सहित ९ ओभर २१३ स्कोर जोडे । सातौँ स्थानका संजय लामाले १० ओभर २१४ स्कोर जोड्दै ४५ हजार रुपैयाँ नगद पाए । आठौँ भएका भुवन नगरकोटी (२१५) ले ४० हजार, नवौं स्थान हासिल गरेका दिनेश प्रजापति (२१९)ले ३६ हजार रुपैयाँ प्राप्त गरे । एमेच्योर सुरेश तामाङ (२२१) दसौँ भए । प्रतियोगितामा शीर्ष २१ प्रो खेलाडीले नगद पुरस्कार प्राप्त गरेका छन् ।

सुभाषले उपाधि जित्ने क्रममा फ्रन्ट नाइनमा २ ओभर ३५ तथा ब्याक नाइनमा १ अन्डर ३४ को प्रदर्शन गरे । पहिलो दिन २ अन्डर ६६ जोडेका उनले पछिल्ला दुवै दिन १ ओभर ६९ स्कोर बनाए । फ्रन्ट नाइनको पहिलो, छैटौँ र सातौँ होलमा बोगी खेपेका उनले नवौँ होलमा बर्डी लेखाए । ब्याक नाइनमा १४औँ र १८औँ होलमा बर्डी खेलेका सुभाषले १६औँ होलमा भने बोगी खेपेका थिए ।

जयरामले फ्रन्ट नाइनमा ३ ओभर ३६ स्कोर जोडेपछि उपाधिबाट टाढा हुनुपरेको थियो । दोस्रो, तेस्रो र छैटौँ होलमा बोगी तथा सातौँमा डबल बोगी खेपेका जयरामले पाँचौ र आठौँमा बर्डी लेखाएका थिए । ब्याक नाइनमा उनले १ ओभर ३६ स्कोर जोडे ।

प्रोफेसनल गल्फर्स संघ नेपालको आयोजना र सूर्य नेपाल प्रालिको प्रायोजनमा हुने प्रतियोगिता चौत १६ देखि सुरु भएको थियो । ५४ होलको प्रतियोगितामा ३० व्यावसायिक र १५ एमेच्योर खेलाडीको सहभागिता थियो । इभेन्टको अन्तिम दिन शनिबार प्रो–एम इभेन्ट हुने छ ।