काठमाडौं । न्यू डायमन्ड एकेडेमी र भारतीय टिम हरियाणा स्पोर्ट्स क्लबले प्रधानमन्त्री कप महिला भलिबल प्रतियोगितामा विजय हासिल गरेका छन् । 

नेपालगन्ज रंगशालाको कभर्डहलमा हरियाणाले नेपाल पुलिस क्लबलाई  ३–२ सेटले पराजित गरेको हो । हरियाणाले १७–२५, १९–२५, २५–१८, २५–१६, १५–१३ को स्कोरमा हराएको हो । पुलिसकी कोपिला राना प्लेयर अफ दी म्याच घोषित भइन् । 

पहिले लगातार दुई सेट हारे पनि हरियाणाले बाँकी तीन सेट जित्न सफल भएको हो । पुलिसका प्रशिक्षक रूपेश बिष्टले हारे पनि खेलाडीको प्रदर्शनबाट आफू सन्तुष्ट रहेको बताए । 

त्यसैगरी दोस्रो खेलमा न्यू डायमन्डले भारतीय टिम एकलब्य स्पोर्ट् कम्प्लेक्स(छत्तीसगढ)लाई ३–० को सोझो सेटमा पराजित गरेको हो । न्यु डायमन्डले २५–१२, २५–८, २५–५ को स्कोरमा विजय हासिल गरेको हो । 

लिग कम नकआउट प्रणालीमा खेलाइएको प्रतियोगिताको तेस्रो दिन शनिबार लिग चरणको अन्तिम खेल लुम्बिनी युनाइडेडविरुद्ध हरियाणा स्पोर्ट्स क्लब तथा त्रिभुवन आर्मी क्लबविरुद्ध एकलब्य स्पोर्ट्स कम्प्लेक्सले प्रतिस्पर्धा गर्ने छ ।