काठमाडौं । ऊर्जा, जलस्रोत तथा सिँचाइमन्त्री पम्फा भुसाल र नेपालका लागि नर्वेका राजदूत टोरुन ड्रम्डालबीच भेटवार्ता भएको छ । भेटमा द्विपक्षीय हित र चासोका विविध विषयमा विचारविमर्श भएको मन्त्रालयले जनाएको छ ।

मन्त्री भुसालले नेपालका लागि नर्वे भरपर्दो विकास साझेदार रहेको उल्लेख गर्दै शान्ति प्रक्रिया तथा संविधान लेखन प्रक्रियामा पनि नर्वे सरकारको सकारात्मक सहयोग प्राप्त भएको स्मरण गरिन् । उनले ऊर्जा विकास, सामाजिक विकास, शैक्षिक गुुणस्तर सुधार तथा जलवायु परिवर्तनका क्षेत्रमा नर्वेले गरेको सहयोगको सराहना गर्दै आगामी दिनमा आपसी चासो र विकासका विषयमा सहकार्य गरेर अगाडि बढ्न नेपाल सरकार इच्छुक रहेको बताइन् ।

मन्त्री भुसालले आफूले मन्त्रालय सम्हालेपछि गुणस्तरीय ऊर्जा उपलब्ध गराउन निरन्तर लागिपरेको तथा सबस्टेसन र प्रसारणलाइन निर्माणलाई विशेष जोड दिएको बताइन् ।

जलवायु परिवर्तनका कारण नेपालले नयाँ–नयाँ चुनौती झेल्नुपरेको भन्दै उनले भनिन्, “जलवायु परिवर्तनका कारण नेपालमा बेमौसमी वर्षा हुने, त्यसले जनधनको क्षति बढाउँदै लगेको छ । त्यस्ता जोखिम न्यूनीकरणका लागि नर्वे सरकारसँग मिलेर काम गर्न चाहन्छौँ ।”

राजदूत ड्रम्डालले नेपालको ऊर्जा क्षेत्रमा लगानी विस्तार गर्न इच्छुक रहेको भन्दै नवीकरणीय ऊर्जा र जलविद्युत्को विकासमा सहकार्य गर्ने बताइन् । उनले जलविद्युत्को क्षेत्रमा नेपालसँग लामो सहकार्य रहेको उल्लेख गर्दै नौ करोड अमेरिकी डलर बराबरको ऊर्जा क्षेत्रमा लगानी रहेको बताइन् । उनले प्रसारणलाइन निर्माणमा भएको ढिलाइबारे चासो व्यक्त गरेकी थिइन् ।