काठमाडौं । ग्लोबल आइएमई बैंक, राष्ट्रिय सहकारी बैंक र स्मार्टच्वाइस टेक्नोलोजिले सहकारीहरुलाई कोपकार्ड जारी गर्ने भएका छन् । उक्त कार्ड जारी गर्ने विषयमा त्रिपक्षीय सम्झौता भएको छ ।

ग्लोबल आइएमई बैंकका प्रमुख कार्यकारी अधिकृत रत्नराज बज्राचार्य, स्मार्टच्वाइस टेक्नोलोजिजका प्रमुख कार्यकारी अधिकृत नारायण प्रकाश भुजु र राष्ट्रिय सहकारी बैंकका प्रमुख कार्यकारी अधिकृत बद्रिकुमार गुरागाईँले सम्झौतापत्रमा हस्ताक्षर गरेका छन् ।

बढ्दै गएको सहकारीको भूमिका र कारोबार समेतलाई मध्येनजर गर्दै सहकारीहरुले पनि न्यूनतम लागतमा सहजै एटीएम कार्ड जारी गर्नसक्ने प्रविधि र प्रकियाका साथ ग्लोबल आइएमई बैंकको प्रायोजनमा कोपकार्ड जारी गर्न लागिएको जनाइएको छ ।

ग्लोबल आइएमई बैंकको प्रायोजनमा राष्ट्रिय सहकारी बैंकमार्फत यसका सदस्य सहकारीहरुले कोपकार्ड जारी गर्नेछन् । यसका लागि एससीटीले चाइना युनियन पे सँग सहकार्य गर्दै आएको जनाइएको छ ।  

सहकारीका सबै सदस्यलाई सेवा पुर्याउँदै अझ प्रभावकारी बनाउन राष्ट्रिय सहकारी बैंकको सहकार्यमा बैंकमा आबद्ध सम्पूर्ण सहकारीहरुलाई एउटै ब्राण्डको कोपकार्ड जारी गर्न लागेको जनाइएको छ । यसरी प्रदान गर्ने कार्ड अन्तर्राष्ट्रियस्तरको चिप कार्ड र कन्ट्याक्टलेस प्रविधिमा आधारित हुनेछ भने नेपाल तथा भारतका एटीएम÷पीओएसमार्फत सहजै चलाउन सकिने जनाइएको छ ।