किभ । शनिबार बिहान सबेरै रुसी फौज युक्रेनको राजधानी किभतर्फ बढेको छ । त्यहाँका सडकहरूमा दोहरो भिडन्त सुरु भएको छ ।

स्थानीय सरकारी अधिकारीहरूले सहरका बासिन्दालाई सुरक्षित स्थानमा आश्रय लिन आह्वान गरेका छन् ।

युक्रेनका राष्ट्रपति भोलोदोमिर जेलेन्स्कीले देशबाट सुरक्षित ढंगले बाहिरिन सहयोगका लागि अमेरिकाले राखेको प्रस्तावको जवाफ फर्काउँदै आफूले युद्ध भइरहेको आफ्नो मुलुक छाड्न नसक्ने बताएका छन् ।

रुसी फौज किभको कति नजिकसम्म प्रवेश गरिसके भन्ने स्पष्ट हुन सकेको छैन । युक्रेनी अधिकारीहरूले केही हदसम्म आक्रमणको प्रतिवाद गर्न सफल भएको बताएका छन् ।

यसैबीच, रुसी फौजको सानो इकाइले मुख्य फौजलाई किभभित्र प्रवेश गराउन युक्रेनको प्रतिरक्षा स्थितिबारे अनुसन्धान गरिरहेको बताइएको छ । आक्रमण सुरु गरिएको तीन दिनभित्रै यसरी तीव्र गतिमा रुसी फौज अघि बढ्दा युक्रेनको स्वाधीनतामाथि नै प्रश्नचिह्न खडा हुनुका साथै त्यहाँको प्रजातान्त्रिक सरकार अपदस्थ हुने र शीतयुद्ध उत्तरार्धको शान्ति र स्थिरता डामाडोल हुने देखिएको छ ।

राष्ट्रपति जेलेन्स्कीले शनिबार एकचोटि फेरि आफ्नो सेनाले रुसी आक्रमणविरुद्ध डटेरै लड्ने अडान दोहोर्‍याएका छन् ।

सहरको मध्यभागमा नै खिचिएको एउटा भिडियोमार्फत उनले भनेका छन्, “मैले सहर छाडेर गएको छैन । युक्रेनी सेनाले हतियार बिसाउँछन् भन्ने दाबी झुटो हो । हामीले मुलुकको रक्षा गर्नेछौँ । हाम्रो हतियार भनेकै हाम्रो सत्य हो र हाम्रो सत्य भनेकै हाम्रो राष्ट्र, हाम्रा बालबालिका हुन् । र, हामी ती सबैको रक्षा गर्दछौँ ।” एपीबाट ।