काठमाडौं । लोकतान्त्रिक समाजवादी पार्टी (लोसपा)ले बिहीबार बस्ने प्रतिनिधिसभाको बैठकमा आफ्ना सांसदलाई अनिवार्य उपस्थित हुन ‘ह्वीप’ जारी गरेको छ ।

बुधबार पार्टी केन्द्रीय कार्यालय बबरमहलमा बसेको संसदीय दलको बैठकले आफ्ना सांसदहरूलाई अनिवार्य उपस्थित हुन ह्वीप जारी गरिएको सांसद लक्ष्मणलाल कर्णले जानकारी दिए ।

यस्तै, बैठकले अमेरिकी सहयोग परियोजना (एमसीसी) सम्झौताको पक्ष वा विपक्षमा मतदान गर्नेसम्बन्धी निर्णय गर्ने सम्पूर्ण अधिकार पार्टी अध्यक्ष महन्थ ठाकुरलाई दिएको छ । अध्यक्ष ठाकुरले संसद् बैठक सुरु हुनुअगावै आफ्ना सम्पूर्ण सांसदलाई निर्णय दिनेछन् ।

“अनिवार्य उपस्थित हुन ह्वीप जारी गरिए पनि पक्ष वा विपक्ष कता उभिने भन्ने निर्णय गर्ने अधिकार अध्यक्षज्यूलाई हामीले दिएका छौँ,” सांसद कर्णले बाह्रखरीसँग भने ।

एमसीसी सम्झौतामाथि भोलिको प्रतिनिधिसभा बैठक छलफल हुँदै छ । सम्भव भए पहिलो नभए दोस्रो दिनको संसद् बैठकबाट एमसीसी अनुमोदन गराउने सरकारको रणनीति छ । एमसीसी सम्झौता यही फागुन ८ गते संसद्मा टेबल भएको थियो ।

प्रतिनिधिसभामा लोसपाका १३ सांसद छन् ।

यो पनि पढ्नोस्–

लोसपा भन्छ– हामीले प्रधानमन्त्री देउवालाई सहयोग गर्नुपर्ने दबाब छ