काठमाडौं । पहिलो हाफमा लिएको अग्रता जोगाउन नसक्दा थ्री स्टार क्लबले सहिद स्मारक ‘ए’ डिभिजन लिगको तेस्रो स्थानमा उक्लने मौका गुमाएको छ ।
बुधबार दशरथ रंगशालमा थ्री स्टारले नेपाल पुलिस क्लबसँग १–१ को बराबरी खेल्दै अंक बाँड्यो । बुधबारै सम्पन्न पहिलो खेलमा तेस्रो स्थानको त्रिभुवन आर्मी क्लबले सातदोबाटोस्थित एन्फा मुख्यालयको मैदानमा हिमालयन शेर्पासँग १–१ को बराबरी खेलेको थियो ।
यस्तो अवस्थामा थ्री स्टारसामु तीन अंक जोड्दै तेस्रो स्थानमा उक्लिने अवसर थियो । तर पूर्व विजेता थ्री स्टारले त्यो अवसरको सदुपयोग गर्न सकेन । लिगमा दुई चरणका खेल बाँकी हुँदा थ्री स्टार १८ अंकका साथ चौथो स्थानमा यथावत छ । जुन तेस्रो स्थानको त्रिभुवन आर्मीभन्दा एक अंकले पछाडि हो भने दोस्रो स्थानको मनाङ मर्स्याङ्दीभन्दा दुई अंकले पछाडि हो । मनाङले एक खेल कम खेलेको छ ।
नेपाल पुलिस भने ११ अंका साथ दसौँ स्थानमा छ । जुन रेलिगेसन क्षेत्रको ब्रिगेड ब्वाइजभन्दा चार अंकले माथि हो ।
थ्री स्टारले रितिक खड्काको गोलबाट २१औँ मिनेटमा अग्रता लिएको थियो । रितिकले संजोक राईको पासमा गोल गरेका थिए । नेपाल पुलिसले ५२औँ मिनेटमा बराबरी गोल फर्कायो । पुलिसका रक्षक सुमन सुवेदीले तेज तमाङको फ्रीकिकलाई सुमनले हेडमार्फत पोस्टको दिशा दिएका थिए ।
बुधबारै दशरथ रंगशालामा सम्पन्न पहिलो खेलमा साविक विजेता मछिन्द्रले सातदोबाटो युथ क्लबलाई १–० ले हराउँदै उपाधि रक्षा गरेको छ । मछिन्द्रले लगातार दोस्रो पटक उपाधि जितेको हो ।
