अमेरिका । बेलायतको राजधानी लन्डनका लागि उडेको अमेरिकन एयरलायन्सको एउटा यात्रुवाहक विमान एकजना यात्रुको जिद्धिपनाका कारण पुनः अमेरिका नै फर्काइएको छ । 

अमेरिकाका मायामी विमानस्थलबाट बुधवार विमान उडेको करिव एक घन्टापछि ति यात्रुले मास्क लगाउन अस्वीकार गरेकै कारण पाइलटले त्यो निर्णय गर्नुपरेको एयरलाइन्सले जनाएको छ ।

अमेरिकन एयरलायन्सका प्रवक्ता कर्टिस ब्लेसिंगले स्थानीय समयअनुसार बेलुका ९ बजेर २४ मिनेट जाँदा बोइंग ७७७ विमान सकुशल अवतरण भएको बताएका छन् । 

मायामी–डेडे प्रहरी विभागले करिब चालिस वर्ष उमेरकी नाम नखुलाइएका ति महिलालाई विमानबाट बाहिर लगेको तर उनलाई गिरफ्तार भने नगरिएको जनाएको छ । 

त्यसपछि १४ जना चालक दलका सदस्य र १ सय २९ जना यात्रु रहेको सो विमानको उडान नै रद्ध गरिएको थियो । यात्रुहरुलाई अर्को विमानबाट गन्तव्यमा पुग्ने व्यवस्था मिलाइएको थियो ।