काठमाडौं । अमेरिकाको लस एन्जलसको जंगलमा लागेको आगो अमेरिकामा फैलिइरहेको छ । २० एकड क्षेत्रफलमा सुरु भएको आगलागी केही घण्टामै १२ सय एकडमा फैलिएको छ ।

दमकल विभागका प्रमुख क्रिस्टिन क्राउलीले ३० हजार मानिसलाई सुरक्षित स्थानमा सार्न निर्देशन दिइएको बताएका छन् । जंगलको आगलागीबाट १३ हजार भवन जोखिममा छन् ।

केही भिडियो फुटेजले प्यासिफिक पेलिसाडेस क्षेत्रका घरहरू नजिकबाट बाक्लो धुवाँ निस्किरहेको देखाएको बीबीसीले जनाएको छ । यहाँ बसोबास गर्ने मानिस आफ्नो घर र सवारीसाधन छोडेर भागेको फुटेजमा देखिन्छ ।

क्यालिफोर्नियामा लाखौं मानिसका लागि चेतावनी जारी गरिएको छ । आगो अझै फैलिने खतरा रहेको समाचारमा जनाइएको छ ।