काठमाडौं । दोस्रो हाफमा गरेको उत्कृष्ट प्रदर्शनमा म्यानचेस्टर युनाइटेडले बुधबार राति इङ्लिस प्रिमियर लिगमा ब्रेन्टफोर्डलाई ३–१ ले हराएको छ ।
पहिलो हाफ गोलरहित बराबरी खेलेको युनाइटेडले ५५औं मिनेटमा एन्थोनी एलान्गाको गोलबाट अग्रता लिएको थियो । १९ वर्षे एलान्गाको प्रिमियर लिगमा यो चौथो खेल हो । उनले फ्रेडको पासमा गोल गरेका हुन् ।
मासन ग्रिनउडले ६२औं मिनेटमा अग्रता दोब्बर बनाए । ७७औं मिनेटमा मार्कुस राशफोर्डले तेस्रो गोल थपेपछि युनाइटेड सहज जित निकाल्न सफल भएको हो । खेल सकिन पाँच मिनेट बाँकी हुँदा इभान टोनीले गरेको गोल ब्रेन्टफोर्डका सान्त्वना बन्यो ।
ग्रिनउड र राशफोर्डको गोलमा ब्रुनो फर्नान्डेजले गोलको अवसर सिर्जना गरिदिएका थिए । खेल सकिन २० मिनेट बाँकी हुँदा मैदान प्रवेश गरेका क्रिष्टियानो रोनाल्डोले भने अपेक्षाकृत प्रदर्शन गर्न सकेनन् । रोनाल्डो सोमबार रातिमात्रै फिफा विशेष अवार्डबाट सम्मानित भएका थिए ।
‘‘पहिलो हाफमा सबैपक्षबाट कमजोर प्रदर्शन भयो,’’ युनाइटेडका प्रशिक्षक राल्फ राङ्कनिकले भने, ‘‘दोस्रो हाफमा हामीले सुधार गर्यौं । आक्रमणबाट दबाब सिर्जना गर्यौं । काउन्टर अट्याकमा सही निर्णय लिन सक्यौं । जसबाट गोल पनि निस्कियो । त्यसले खेलमा फरक पार्यो ।’’
जितपछि २१ खेलबाट ३५ अंक जोडेको म्यानचेस्टर युनाइटेड सातौं स्थानमा छ । जुन चौथो स्थानको वेष्ट ह्यामभन्दा दुई अंकले पछाडि हो । तथापि, वेष्ट ह्यामले एक खेल बढी खेलेको छ । १९ खेलबाट ३६ अंक जोडेको टोटनहम पाँचौं स्थानमा छ भने २० खेलबाट ३५ अंक जोडेको आर्सनल छैटौं स्थानमा छ । पराजित ब्रेन्टफोर्ड २३ अंकका साथ १४औं स्थानमा छ ।