बीबीसी । अमेरिकाले युक्रेनको मामिलामा शान्तिपूर्ण बाटो अपनाउन रुसलाई आग्रह गरेको छ ।

युक्रेनमाथि आक्रमण हुने डर बढिरहेका बेला अमेरिकी विदेशमन्त्री एन्टोनी ब्लिङ्कनले ‘कूटनीतिक र शान्तिपूर्ण बाटो’ अपनाउन रुसलाई आग्रह गरेका हुन् ।

अनुमानित एक लाख रुसी सेना युक्रेनको सीमानामा तैनाथ गरिएको छ । युक्रेनी राजधानी कीभ भ्रमणमा रहेका विदेशमन्त्री ब्लिङ्कनले छोटो समयमा उनीहरूलाई बलियो बनाउने रुसी योजना रहेको बताएका छन् ।

रुसले छिमेकी युक्रेनमाथि आक्रमण गर्ने योजना बारम्बार अस्वीकार गर्दै आएको छ । तर, वरिष्ठ अमेरिकी अधिकारीहरूले मस्कोले कुनै पनि समयमा आक्रमण गर्न सक्ने बताउँछन् ।

अमेरिकी विदेशमन्त्री ब्लिङ्कनले युरोपेली सहयोगीहरूसँग कुराकानी गरेपछि शुक्रबार जेनेभामा रुसी समकक्षीसँग भेट्नेछन् ।

रुसी विदेशमन्त्री सर्गेइ लाभ्रोभले रुसले युक्रेनमाथि आक्रमण गर्ने तयारी गरेको भन्ने अमेरिकी दाबी अस्वीकार गर्दै त्यो पूर्ण रूपमा गलत भएको बताएका छन् ।

युक्रेनका रक्षामन्त्री ओलेक्सी रेजनीकोभले मस्कोमाथि तत्काल प्रतिबन्ध लगाउन पश्चिमा सरकारहरूलाई आग्रह गरेका छन् ।

बढ्दो तनावबीच बेलायतले युक्रेनमा एन्टी ट्याङ्क मिसाइल पठाएको छ ।

मंगलबार मस्को भ्रमण गरेका जर्मन विदेशमन्त्री एनालेना बारबोकले थप सैन्य वृद्धि गरे रुसी सत्ताले आर्थिक, राजनीतिक र रणनीतिक मूल्य चुकाउनुपर्ने चेतावनी दिएकी छन् ।