विराटनगर । चार करोड २९ लाख रुपैयाँको लागतमा निर्माण सम्पन्न भएको वर्ष दिन पुग्न नपाउँदै सहिद रंगशालाको फ्लड लाइट बल्न छाडेको छ ।

एक सातायता गरिएका परीक्षणका क्रममा टावरमा जडित फ्लड लाइटका बल्ब पड्किएका हुन् । अघिल्लो वर्ष निर्माण सम्पन्न भई सहिद रंगशालामा फ्लड लाइटमा रात्रिकालीन विराट गोल्डकप फुटबल प्रतियोगिता आयोजना गरिएको थियो ।

प्रदेश नम्बर–१ सरकारको सामाजिक विकास मन्त्रालयले रंगशालामा लाइट जडान गर्न पाँच करोड बजेट दिएको थियो । विराटनगर महानगरपालिकाले समेत फ्लड लाइट जडानका लागि दुई करोड रुपैयाँ दिने घोषणा गरेको थियो । तर, पछि सामाजिक विकास मन्त्रालय एक्लैले बजेट दिएर टावर निर्माण र त्यसमा लाइट जडान गर्ने कार्य सम्पन्न भएको थियो । उक्त कार्यका लागि आवश्यक सामग्री र प्राविधिक भारतबाट झिकाइएको थियो ।

सामाजिक विकास मन्त्रालय र कार्की बन्धु अमर जेभीबीच ३२ देखि ३५ मिटरसम्मको उचाइको हरेक फ्लड लाइट फ्रेममा एक हजार वाटका २७ वटा बत्ती जडान गर्ने गरी ठेक्का सम्झौता भएअनुरूप काम सम्पन्न भएको थियो । ३३ मिटरका चारवटा पोल रंगशालाको चारैतिर ठड्याएर १०८ वटा लाइट जडान गरिएको थियो । यसका निम्ति चार करोड २९ लाख रुपैयाँमा ठेक्का लागेको थियो ।

सामाजिक विकास मन्त्रालयका प्रवक्ता कृष्णप्रसाद प्रोखरेलले रंगशालाका फ्लड लाइटले काम गर्न छाडेको विषयमा मन्त्रालयमा समेत जानकारी प्राप्त भएको बताए । “हामीले लगत्तै गएर निरीक्षण पनि गरिसकेका छौँ । समस्या देखिएको छ,” उनले भने, “मर्मत गराउन ठेकेदार कम्पनीसँग छलफल गरिसकेका छौँ ।”

हाइभोल्टेज बिजुली प्रवाह गर्दा प्राविधिक खराबीका कारण समस्या भएको हुन सक्ने प्रवक्ता पोखरेलले बताए ।

कोरोना संक्रमण सुरु हुनुभन्दा अघिल्लो वर्ष बाँसका टावर बनाएर भारतबाट फ्लड लाइट तथा प्राविधिक भाडामा झिकाएर प्रतियोगिता गरिएसँगै स्थायी संरचनाको माग उठेको थियो । तत्कालीन सामाजिक विकासमन्त्री जीवन घिमिरेले निजी क्षेत्र र खेलसम्बद्ध संघ–संस्थाको माग सम्बोधन गर्दै स्थायी संरचना निर्माणको लागि काम अघि बढाएका थिए ।