काठमाडौं । गृहमन्त्री बालकृष्ण खाणले निजामती कर्मचारीहरूका युनियन सबैको साझा हुनुपर्ने बताएका छन् ।  नेपाल निजामति कर्मचारी युनियन, गृह मन्त्रालयको ८औँ विभागीय अधिवेशनको उद्घाटन कार्यक्रममा मन्त्री खाणले युनियनले सरकारले सेवा सुविधा नदिँदा, सरकार जनताप्रति उत्तरदायी नहुँदा र राम्रो काम हुन नसक्दा सरकारलाई दबाब दिनुपर्ने बताए ।

"निजामति कर्मचारी युनियन सबैको साझा हुनुपर्छ । युनियनले सरकारले सेवा सुविधा नदिँदा, सरकार जनताप्रति उत्तरदायी नहुँदा र राम्रो काम हुन नसक्दा सरकारलाई दबाब दिनुपर्छ," मन्त्री खाणले भने ।

उनले अन्य मन्त्रालयमाजस्तो गृह मन्त्रालयमा तोकिएको समयावधि नहुने पनि बताए । उनले गृह मन्त्रालयले संविधानमा लेखिएका, सरकारले बनाएका र मन्त्रालय आफैले बनाएका ऐन, नियम र कानुन कार्यान्वयन गर्ने र कतिपय अवस्थामा कतै नलेखेका विषयमा पनि काम गर्नु पर्ने भएकाले तोकिएको समयमा मात्रै काम गर्छु भनेर नपुग्ने बताए ।

तोकिएको समयभन्दा बढी काम गर्नु पर्ने भएकाले थप समयमा काम गरेमार्फत कम्तीमा खाजा खर्च थप गर्ने विषयमा आफूले अर्थ मन्त्रालयमा कुराकानी गरिरहेको पनि गृहमन्त्री खाणको भनाइ थियो ।