काठमाडौं । सुनसरीको इटहरी उपमहानगरपालिका–२०, तरहरामा बसको ठक्करबाट मोटरसाइकलमा सवार दुईजनाको मृत्यु भएको छ ।

मोटरसाइकल चालक संखुवासभाको खाँदबारी नगरपलिका–७ का २६ वर्षीय सन्तोष राई र पछाडि सवार सोही ठाउँ बस्ने २० वर्षीय अभि राईको मृत्यु भएको हो । बसको ठक्करबाट घाइते भएका दुवैजनाको उपचारका क्रममा धरानस्थित बीपी कोइराला स्वास्थ्य विज्ञान प्रतिष्ठानमा मृत्यु भएको जनाइएको छ ।

धरानबाट इटहरीतर्फ आउँदै गरेको प्रदेश १–०२–००१ख ८१९६ नम्बरको बसले को२७प २१९ नम्बरको मोटरसाइकललाई हिजो बेलुका करिब साढे ७ बजे ठक्कर दिएको थियो । बससहित चालक प्रहरीचौकी तरहराको नियन्त्रणमा छन् ।

धनुषामा जीप र कार ठोक्किँदा एकजनाको मृत्यु
धनुषाको मिथिला नगरपालिका–८, बडहरीमा जीप र कार आपसमा ठोक्किँदा एकजनाको मृत्यु भएको छ । कारमा सवार एकजना गम्भीर घाइते छन् ।

गए राति करिब पौने १० बजे प्रदेश २–०२–००१ च ०७२८ नम्बरको जीप र बा१७च ३७८६ नम्बरको कार आपसमा ठोक्किएका थिए ।

दुर्घटनामा कार चालक महोत्तरीको गौशाला नगरपालीका–२ का ३५ वर्षीय उदय चौधरीको मृत्यु भएको हो । गम्भीर घाइते भएका उनको उपचारका क्रममा जनकपुरस्थित प्रादेशिक अस्पतालमा मृत्यु भएको जनाइएको छ ।

घाइते भएका कारमा सवार ३४ वर्षीय राकेश चौधरीको सोही अस्पतालमा उपचार भइरहेको छ । जीप चालक इलाका प्रहरी कार्यालय ढल्केबरको नियन्त्रणमा छन् ।

कैलालीमा ट्याक्टरको ठक्करबाट पैदलयात्रीको मृत्यु
कैलालीको गोदावरी नगरपालिका–९, धनचौरीमा ट्याक्टरको ठक्करबाट पैदलयात्रीको मृत्यु भएको छ । कञ्चनपुरको कृष्णपुर नगरपालिका–६, मौरीफाटाका ३५ वर्षीय करन भट्टराईको मृत्यु भएको हो ।

हिजो बेलुका करिब ८ बजे रा१त ४६५३ नम्बरको ट्याक्टरले पैदल हिँडिरहेका भट्टराईलाई ठक्कर दिएको थियो । ट्याक्टर चालक जिल्ला प्रहरी कार्यालय कैलालीले नियन्त्रणमा रहेको जनाइएको छ ।