विराटनगर । नेपाली कांग्रेस प्रदेश नम्बर १ को मतगणना पुनः गर्नुपर्ने मागको सम्बन्धनमा प्रदेश निर्वाचन समितिले के गर्ने भनी केन्द्रसँग राय लिन पत्राचार गर्ने भएको छ । 

सोमबार बिहान आएको मत परिणामअनुसार सभापति पदमा संस्थापनइतर समूहका गुरुराज घिमिरे संस्थापन पक्षका उद्धव थापासँग दुई मतले पराजित भएपछि घिमिरेले पुनः मतगणना गर्न माग गर्दै निर्वाचन समितिमा आवेदन दिएका थिए । निर्वाचन समितिसमक्ष आफूले पुनः गणनाको प्रक्रिया थाल्न माग गरेको घिमिरेले बताए ।

काङ्ग्रेसको प्रदेश निर्वाचन समितिका प्रमुख भरत थापाले पुनः मतगणनाका लागि आवेदन आएको र यस विषयमा केन्द्रीय निर्वाचन समितिसँग राय लिएर मात्र के गर्ने नगर्ने भन्ने निर्णयमा पुग्ने बताए । 

“मत गणनाका लागि घिमिरेले निवेदन दिनु भएको छ तर, अब केन्द्रीय निर्वाचन समितिलाई पत्राचार गर्छौ उताबाट जे निर्णय हुन्छ, सोहीअनुरुप गर्छौ’, प्रमुख थापाले भने । 

थापा विजयी भएको घोषणा गरिसकेकाले न्यायको सिद्धान्तअनुसार फेरि आफैँले पुनः गणनाको प्रक्रिया थाल्न नमिल्ने भएकोले उमदेवार घिमिरेको निवेदन निर्णयार्थ केन्द्रीय निर्वाचन समितिमा पठाउने थापाले बताए । 

सभापतिका प्रत्याशी उद्धव थापाले ८४४ मतले ल्याएर विजयी बने । घिमिरेले ८४२ मत प्राप्त गरे । प्रदेश नम्बर १ मा कांग्रेस पदाधिकारीमा संस्थापन–सिटौला समूहका अधिकांश विजयी भएका छन् ।