जनकपुरधाम । नेपली कांग्रेसको १४औँ महाधिवेशन अन्तर्गत आजदेखि सर्लाहीमा सुरु भएको वडा अधिवेशनमा गोली चलेको छ ।बलरा नगरपालिका-९ अचलगढमा वडा अधिवेशनमा दुई पक्षबीच विवाद भएपछि गोली चलेको हो । 

विवाद हुँदा प्रदेश २ का महिला बालबालिका युवा तथा खेलकुदमन्त्री वीरेन्द्र सिंहका अंग रक्षकले गोली चलाएका हुन् ।  मन्त्री सिंहसँग पार्टीकै केन्द्रीय नेता अमरेश सिंह निकटको नेताहरूले विवाद गरेको बताइएको छ । सोही क्रममा मन्त्रीको अंग रक्षकले गोली फायर गरेका हुन् ।

अहिले प्रहरीले स्थिति नियन्त्रणमा लिएको छ । सर्लाहीका प्रहरी उपरीक्षक कृष्ण प्रसाईंले बलराको ८ र ९ नम्बर वडाको अधिवेशनमा विवाद हुँदा गोली फायर भएको बताए । उनका अनुसार कुनै मानवीय क्षति भने भएको छैन । 

विवादका कारण त्यहाँको अधिवेशन रोकिएको छ । उनका अधिवेशनस्थलमा झडप भएको थियो । सोही क्रममा मन्त्रीको अंग रक्षकलाई चोट पनि लागेको छ । 

११ वटा वडा रहेको बलरामा पाँच वडामा सहमति भएको छ । ४ वडामा छलफल चलिरहेको बताइएको छ । यी ४ वडामा सहमति नभए निर्वाचन गराउने निर्वाचन अधिकृतको तयारी छ ।