जनकपुरधाम । नेपाली कांग्रेसको अधिवेशन गराउन सर्लाहीमा दोस्रोपटक गएका निर्वाचन अधिकृतले पनि राजीनामा दिएका छन् । बिहीबार कुटपिट भएपछि निर्वाचन गराउन पुगेका अधिकृत दिवाकरराज पाण्डेले पदबाट राजीनामा दिएका हुन् ।

पहिलोपटक खटाइएको निर्वाचन अधिकृत विनोद कार्की दुई पक्षको विवादले अधिवेशन गराउन नसक्ने भन्दै गएको कात्तिक २६ गते राजीनामा बुझाएका थिए । त्यसपछि केन्द्रीय निर्वाचन समितिले कात्तिक २७ गते पाण्डेलाई नयाँ निर्वाचन अधिकृतको रूपमा सर्लाही पठाएको थियो । तर, कुटपिटपश्चात् उनले पनि राजीनामा दिएका हुन् ।

पाण्डेले दुवै पक्षलाई सहमतिमा ल्याएर अधिवेशन गराउन अथक प्रयास गरे पनि सम्भव नभएको बताए । दोस्रोपटक खटाइएको निर्वाचन अधिकृतले पनि राजीनामा दिएपछि सर्लाहीमा कांग्रेसको अधिवेशन झनै अन्योलमा परेको छ । क्रियाशील सदस्यता विवादलाई लिएर असन्तुष्ट पक्ष काठमाडौं पुगेका छन् ।

सर्लाहीमा कांग्रेसका जिल्ला सभापति नागेन्द्रकुमार राय र पूर्वजिल्ला सभापति लक्ष्मण राय पक्षबीचको विवादका कारण अधिवेशन प्रक्रिया अगाडि नबढेको बताइएको छ । नागेन्द्र पार्टी सभापति शेरबहादुर देउवानिकट हुन् भने लक्ष्मण वरिष्ठ नेता रामचन्द्र पौडेलनिकट मानिन्छन् ।

धनुषामा पालिका तथा प्रदेशसभा क्षेत्रीय निर्वाचन स्थगित
धनुषामा नेपाली कांग्रेसको पालिका तथा प्रदेशसभा क्षेत्रीय निर्वाचन स्थगित भएको छ । यही मंसिर ४ र ६ गतेको लागि निर्धारण गरिएको अधिवेशन स्थगित गरिएको निर्वाचन अधिकृत अरुणकुमार ज्ञावालीले बताए ।

कांग्रेसको १४औँ महाधिवेशनका लागि मंसिर १ गतेको सूचनाअनुसार पालिकास्तरीय तथा प्रदेशसभा क्षेत्रीय अधिवेशनको मिति मंसिर ४ र ६ गतेका लागि निर्धारण गरिएको थियो । तर, प्राविधिक कारण देखाउँदै अधिवेशन अनिश्चितकालका लागि स्थगित गरिएको छ ।

धनुषाका पाँचवटा वडामा विवाद देखिएको छ । धनुषाको औरही नगरपालिकाका कार्यकर्ता वडा अधिवेशनमै धाँधली भएको भन्दै विरोधमा उत्रिएका छन् । उनीहरू अहिले कांग्रेसको जनकपुरधामस्थित जिल्ला पार्टी कार्यालयमा रिले अनशनमा छन् । अर्को पक्षले पार्टी कार्यालयबाहिर उनीहरूलाई घेराउ गरेको छ । यद्यपि, प्रहरीले अनशनकारीहरूलाई सुरक्षा दिएको छ ।

औरही गाउँपालिका वडा नम्बर-१ मा धाँधलीपूर्ण तरिकाले पदाधिकारी चयन गरिएको भन्दै रिले अनशन सुरु गरिएको जगदीश चौधरीले बताए ।  ‘'यथार्थ कार्यकर्तालाई बाइपास गरी पदाधिकारी चयन गरिएको छ,’' उनले भने, ‘'जुन धाँधलीपूर्ण काम गरिएको छ । त्यसलाई बदर गर्नु जरुरी छ ।’' उनले धाँधलीपूर्ण काम बदर नगरिए आफूहरू भोक हड्तालमा उत्रने पनि चेतावनी दिए ।