जनकपुरधाम । प्रदेश नम्बर–२ प्रदेशसभाको सातौँ अधिवेशन आजदेखि सुरु भएको छ ।

पहिलो बैठकलाई सम्बोधन गर्दै मुख्यमन्त्री लालबाबु राउतले प्रदेश सरकार जालझेलको सिकार भइरहेको बताएका छन् । ‘मुख्यमन्त्री बेटी पढाऊ, बेटी बचाऊ कार्यक्रम’का सम्बन्धमा उठेका सवालहरूको जवाफ दिँदै उनले प्रदेश सरकार जालझेल र षड्यन्त्रको सिकार भइरहेको बताएका हुन् ।

उक्त कार्यक्रमअन्तर्गत साइकल वितरण नीति, नियम र बजेट कार्यक्रमानुसार सञ्चालन भएको उनले दाबी गरे । “ईबिडिङअनुसार भएको छ । नियमानुसार भएको छ । त्यसको बजेट व्यवस्थापन तपाईंहरूले नै गर्नुभएको छ,” उनले भने, “तपाईंहरूको जिज्ञासा हामीले समेटेकै छौँ । साइकलको वेट पनि बढाइएको छ । फरक दररेटमा इस्टिमेट फरकको कारण भएको छ ।”

मुख्यमन्त्री राउतले आफ्नो सम्बोधनको अधिकांश समय उक्त कार्यक्रमबारे प्रष्ट गर्न खर्चिए । छोरी बिमा विभिन्न कारण रोकिएको उनले उल्लेख गरे । प्रदेशवासीको असीमित आकांक्षा पूरा गर्नु चुनौतीपूर्ण भएको उनको भनाइ छ ।

उनले कर्मचारीको असहयोग र महिनैपिच्छैको सरुवाले काम गर्न नसकेको जिकिर गरे ।