काठमाडौं । साविक विजेता हेल्प नेपालले आज गलकोट स्पोर्ट्स क्लबलाई ३–१ को सेटमा हराउँदै राष्ट्रिय महिला तथा पुरुष एनभीए क्लब भलिबल च्याम्पियनसिपको क्वार्टरफाइनलमा स्थान बनाएको छ ।

समूह चरणको अन्तिम खेल जितेसँगै हेल्प नेपाल समूह ‘ए’को विजेता बनेको छ । समूहमा चरणमा सबै खेल जितेको हेल्प नेपालले ९ अंक जोड्यो । हारका बाबजुद गलकोटले उपविजेता बन्दै अन्तिम आठमा स्थान बनायो । गलकोटको ६ अंक छ । यसअघि, दुवै टोलीले वाग्मती प्रदेश  र प्रदेश नम्बर–२ लाई हराएका थिए ।

काठमाडौंको त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा हेल्प नेपालले गलकोटलाई २५–१८, २२–२५, २५–२२ र २५–१९ को स्कोरमा हराएको हो ।

हेल्प नेपालले अब समूह ‘सी’को उपविजेता नयाँ बजार युवा क्लबविरुद्ध खेल्नेछ ।  पराजित गलकोटले समूह ‘सी’को विजेता त्रिभुवन आर्मी क्लबविरुद्ध खेल्नेछ ।

क्वार्टरफाइनलका अरू खेलमा समूह ‘बी’को विजेता नेपाल पुलिस क्लबले समूह ‘डी’को उपविजेता ढोरपाटन स्पोर्ट्स क्लबसँग प्रतिस्पर्धा गर्नेछ । समूह ‘बी’को उपविजेता गण्डकी प्रदेशले अर्को विभागीय टोली एपीएफसँग प्रतिस्पर्धा गर्नेछ । एपीएफ समूह ‘डी’ विजेता टोली हो ।

नेपाल पुलिस क्लबले आजै गण्डकी प्रदेशलाई ३–० को सोझो सेटमा हराएको थियो ।