पोखरा । नेपाली कांग्रेसको १४औँ महाधिवेशनअन्तर्गत शनिबारदेखि स्थानीय तहको निर्वाचन सुरु भएको छ । केही ठाउँमा सर्वसम्मत रूपमा निर्वाचन सकिएको छ भने कतै मतगणना चल्दै छ ।

सोही क्रममा लमजुङको राइनास नगरपालिकामा भने कांग्रेस कार्यकर्ताले मतपत्र जलाएका छन् । २०२ क्षेत्रीय प्रतिनिधि रहेको सो नगर चुनावमा १२३ मत खसेपछि चुनाव नै रोकिएको छ । मतदाताको रूपमा रहेका क्षेत्रीय प्रतिनिधि घर फर्किएका छन् ।

यसको कारणचाहिँ नगर सभापतिको उमेदवार विवादले हो । उक्त नगरपालिकाको सभापतिमा नुरराज कडरिया र श्रीकृष्ण पौडेलको प्यानल चुनावमा भिडेको थियो ।

तर, मतपत्रमा मत दिने संकेत कडरियाको नाममा मात्र राखिएको छ । पौडेललाई मत दिने ठाउँमा मत संकेत गर्ने कुनै विकल्प राखिएको छैन । यसबाहेक दुवैको क्रमसंख्या १/१ राखिएको छ ।

यो मतपत्रका कारण कडरिया समूहको मात्र मतगणना हुने देखिएपछि मतदाताले मतपत्र नै जलाएका छन् । एक मतदात सुवास पौडेल भन्छन्, “दुवैको क्रमसंख्या १ छ, एकजना उमेदवारलाई त मत नै दिन नपाइने बनाइएको छ । २०२ मतदातामा १२३ मतदान भएको छ । निर्वाचन अधिकृतको मिलेमतोमा बनाइएको यो मतपत्र च्यातिएको छ । अब अधिवेशन कहिले हुन्छ थाहा छैन ।”

आफूले आफैँलाई मत हाल्न नपाउने गरी तयार भएको मतपत्रबारे नगर सभापतिका उमेदवार पौडेल भन्छन, “म त मत माग्नमा व्यस्त थिएँ । मतपत्र तयार भएपछि दुवै उमेदवारलाई निर्वाचन अधिकृतले बोलाउनुपर्ने हो, त्यो पनि भएन । वर्णानुक्रम अनुसार मेरो नाम अगाडि आउनुपर्थ्यो, त्यो पनि आएन । अर्को कुरा, दुईजना उमेदवार भएपछि क्रमसंख्या स्वत १ र २ हुनुपर्ने हो । दुवैको १/१ छ । यहाँ सरासर निर्वाचन अधिकृतको बेइमानी देखिन्छ । त्यसकारण चुनाव रोक्नुपर्छ भनेर लागेका हौँ ।”

उक्त नगरमा निर्वाचन गराउने दायित्व दिनेश चिलुवालले पाएका थिए । निर्वाचन अधिकृतको भूमिकामा उठेका प्रश्नबारे उनले भने, “प्राविधिक त्रुटि ३/४ मत खसेपछि मैले थाहा पाएको हुँ ।”

तर, निर्वाचन अधिकृतले नै मतपत्रमा हस्ताक्षर गर्ने भएपछि त्यो त तपाईंको कमजोरी देखियो, एउटा समूहलाई फाइदा हुने गरी काम गर्नुभयो नि, क्रमसंख्या पनि एउटै राख्नुभएछ त ? भन्ने प्रश्नमा उनले भने, “दुवैपक्षका एजेन्टलाई बोलाएर मतपत्र देखाएको हो, उहाँहरूले हुन्छ भनेपछि मतदान सुरु भएको हो । मतपत्रमा प्राविधिक त्रुटि मैले पनि पछि थाहा पाएँ । थाहा पाएपछि दुवैतर्फबाट एजेन्ट बोलाएको हो । यसले केही फरक पर्दैन भनेपछि मतदान अगाडि बढाएका हौँ । तर, रोकियो । अब कहिले हुन्छ थाहा छैन ।”

सभापतिका अर्का उमेदवार नुरराज कडरियाले निर्वाचन अधिकृतको त्रुटिका कारण मतपत्रमा प्राविधिक गल्ती देखिएकोले चुनाव रोकिएको बताए ।