काठमाडौं । संविधानले व्यवस्था गरेबमोजिम शिक्षा, स्वास्थ्य र रोजगारीलाई मौलिक हकका रूपमा कार्यान्वयन गर्न प्रतिबद्धता जनाइदिन भनी संयुक्त विद्यार्थी गठबन्धले तीन जना पूर्व प्रधानमन्त्रीहरूलाई ज्ञापनपत्र बुझाएको छ । बुधबार नेविसंघ, अखिल क्रान्तिकारी, माधव नेपाल पक्षीय अनेरास्ववियु, समाजवादी विद्यार्थी युनियन र अखिल (छैठौँ) ले संयुक्त रूपमा पूर्व प्रधानमन्त्रीहरू शेरबहादुर देउवा, पुष्पकमल दाहाल ‘प्रचण्ड’ र माधव कुमार नेपाललाई ज्ञापनपत्र बुझाएका हुन् । 

नेपालको संविधानको धारा ३१, ३३ र ३५ मा क्रमशः शिक्षा, रोजगारी र स्वास्थ्यको हकलाई मौलिक हकको रूपमा किटानी गरिएकाले सोही अनुसार कक्षा ८ सम्मको शिक्षा निशुल्क र अनिवार्य तथा कक्षा १२ सम्मको शिक्षा निस्शुल्क हुनुपर्ने उनीहरूको भनाइ छ ।

यस्तै, उनीहरूले स्वास्थ्य र रोजगारीको हक पनि पूर्ण रूपमा सुनिश्चित हुनुपर्ने बताएका छन् ।

नेपाली जनता र विद्यार्थी आन्दोलनको लामो लडाइँको परिणामस्वरूप संविधानमा व्यवस्था गरिएको शिक्षा, स्वास्थ्य र रोजगारीको मौलिक हकलाई सरकारमा रहँदा वा नरहँदा कार्यान्वयन गर्ने सार्वजनिक प्रतिबद्धता जनाइदिन भनी शीर्ष नेताहरूको ध्यानाकर्षण गराइएको संयुक्त विद्यार्थी गठबन्धनले जनाएको छ ।