पोखरा । गण्डकी प्रदेशमा शनिबार नयाँ सरकार गठन भएको छ । नेपाली कांग्रेस गण्डकी संसदीय दलका नेता कृष्णचन्द्र नेपाली पोखरेल मुख्यमन्त्री बनेका छन् ।

उनले आफूसँगै अरु चारलाई मन्त्री पदको शपथ खुवाए । ती चारैजनाले विनाविभागीय मन्त्रीको रुपमा शपथ लिएका हुन् । मन्त्री बनेका मध्ये जनता समाजवादी पार्टी (जसपा)का हरिशरण आचार्य एक हुन् ।

तर, जसपाभित्र विवाद देखिएको छ । गण्डकीमा जसपाका दुई प्रदेशसभा सदस्य छन् । आचार्य मन्त्री बने पनि जसपाकै अर्का प्रदेश सांसद धनमाया पोखरेल लामाले असन्तुष्टि जनाएकी छन् ।

आज विस्तारित मन्त्रिमण्डलमा उनको विमति छ । सरकार गठनका सम्बन्धमा गठबन्धनभित्र ठोस सहमति नभएको उनले बताइन् ।

“कुरा मन्त्रालयको होइन, कोही भ्रममा नपरौँ । हस्ताक्षर र सहमति हुन नसकेको सत्य हो,” उनले भनिन्, “यस्तो हर्कतले राजनीतिमा दिगो सहकार्य हुन सक्दैन ।”