काठमाडौं । ब्रोडब्यान्ड इन्टरनेट सेवालाई हरेक गाउँ–बस्तीमा पुर्याउने कार्यको थालनी गरिएको छ । डिजिटल नेपाल अभियानअन्तर्गत स्मार्ट जिल्लाहरु निर्माण गर्दै जाने लक्ष्यानुरुप स्थानीय तहहरुको समन्वयमा बस्ती–बस्तीमा ब्रोडब्यान्ड इन्टरनेट पुर्याउने कार्यको थालनी गरिएको हो ।
सञ्चार तथा सूचना प्रविधि मन्त्रालयको प्रस्तावमा मन्त्रिपरिषद्को गएको माघ २९ गतेको बैठकले उक्त कार्यक्रमअन्तर्गत काठमाडौं उपत्यकाबाहेकका ७४ जिल्लाहरुका सबै सामुदायिक आधारभूत विद्यालयहरुमा इन्टरनेट सेवाको पहुँच पुर्याइने दूरसञ्चार प्राधिकरणले जनाएको छ ।
साथै, यसअगाडि भिन्न प्रविधिमार्फत इन्टरनेट सेवा पुगेका भूकम्पप्रभावित जिल्लाहरुमा समेत यसअगाडि जडान गरिएको इन्टरनेटको क्षमता वृद्धि गरी ब्रोडब्यान्ड इन्टरनेट सेवा पुर्याइने प्राधिकरणले जनाएको छ ।
पहिलो चरणको कार्यक्रममा २०७२ सालको भूकम्पबाट अति प्रभावित आठ जिल्लाहरु काभ्रेपलाञ्चोक, नुवाकोट, रसुवा, सिन्धुपाल्चोक, दोलखा, सिन्धुली, ओखलढुंगा र रामेछापका हरेक गाउँ–बस्तीका सरकारी सेवा केन्द्रहमा फाइबरलाइन विस्तार गरी इन्टरनेट सेवाको पूर्वाधारण पुर्याउने अभियान पनि सुरु गरिएको छ । उक्त आठ जिल्लाका ७६ वटा स्थानीय तहहरुसँग सहकार्य गरी काम अगाडि बढाउन स्थानीय तहहरुसँग सम्झौता गर्ने कार्य भइरहेको प्राधिकरणले जनाएको छ ।
नेपालका सहरी र ग्रामीण इलाकाहरुमा देखिएको डिजिटल डिभाइडको खाडल पुर्न सम्झौता गरेको मितिले तीन महिनाभित्र स्थानीय तहका सबै सरकारी सेवा केन्द्रहरुसम्म ब्रोडब्यान्ड सेवाको पहुँच पुर्याउने गरी उक्त कार्यक्रम ल्याइएको प्राधिकरणले जनाएको छ ।
यस कार्यक्रमअन्तर्गत इन्टरनेट सेवाको क्षमता अभिवृद्धि गर्ने गरी सबै स्थानीय तह, वडा कार्यालय, सामुदायिक स्वास्थ्य संस्था तथा सामुदायिक माध्यमिक विद्यालयहरुमा न्यूनतम २० एमबीपीएसको ननडेडिकेटेड इन्टरनेट सेवा उपलब्ध गराइनेछ । उक्त सेवा जडान भएको दुई वर्षसम्म निःशुल्क रुपमा सेवा उपलब्ध गराइने जनाइएको छ ।
त्यसपछिका वर्षहरुमा उक्त संस्थाहरु आफैँले नवीकरण गरी नियमित रुपले सेवा सञ्चालनमा ल्याउनुपर्ने प्राधिकरणका प्रवक्ता सन्तोष पौडेलले जनाएका छन् ।