काठमाडौं । महानगरीय प्रहरी परिसर लतिलपुरले जिल्लाका विभिन्न स्थानमा प्रयोगविहीन रहेका २३० थान अक्सिजन सिलिन्डरहरु संकलन गरी विभिन्न अस्पतालहरुलाई बुझाएको छ ।

संकलन गरिएका अक्सिजन सिलिन्डरमध्ये डीसीसीएमसीको बैठकबाट निर्णय भएअनुसार अक्सिजन सिलिन्डर अस्पताललाई बुझाइएको हो ।

पाटन स्वास्थ्य विज्ञान प्रतिष्ठानलाई ८० थान, किस्ट मेडिकल कलेज इमाडोललाई ५० थान, ब्रजबाराही अस्पताल चापागाउँलाई १० थान, अल्का अस्पताल जावलाखेललाई १५ थान, सुमेरु अस्पताल धपाखेललाई १० थान, स्टार अस्पताललाई २० थान, मेघा अस्पताललाई २० थान, गणेशमान सिंह अस्पताललाई १० थान र ललितपुर महानगरपालिकाबाट सञ्चालित बागडोलस्थित वृद्धाश्रममा रहेको आइसोलेसन सेन्टरलाई १५ थान अक्सिजन सिलिन्डर बिरामीहरुको प्रयोजनका लागि बुझाइएको जनाइएको छ ।