काठमाडौं । काठमाडौंमा दोस्रो चरणको कोरोना तीव्र गतिमा फैलिरहेका बेला रोकथाम गर्न जनशक्ति व्यवस्थापन र स्रोत परिचालनमा महानगरको तयारी शून्य देखिएको छ । अहिले महानगरमा दैनिकजसो बैठक त बस्छन् । तर, ठोस उपलब्धी खासै केही देखिदैन । 

सरकारले गरेको निषेधाज्ञासँगै महानगरले जनशक्ति र स्रोत परिचालन गर्नुपर्नेमा महानगरका मेयर विद्या सुन्दर शाक्य काठमाडौंबासीलाई आफै सतर्क हुन भन्दै मौन देखिन्छन् । 

महानगरले भने दोस्रो चरणको कोरोना महामारीविरुद्ध लड्न पूर्वतयारी गरिरहेको दाबी गर्दै आएको छ । तर महानगरका क्रियाकलाप हेर्ने हो भने कोरोना रोकथाम गर्न कुनै पनि छलफल प्रभाकारी भएको देखिएको छैन् । 

महामारी बढ्दै जाँदा सरकारले उपत्यका लगायतका जिल्लामा १६ गतेदेखि निषेधाज्ञा जारी गरेको छ । काठमाडौंमा अहिले महानगरीय प्रहरीले निषेधाज्ञा कार्यान्वयन गर्न गराउने काम गरिरहेको छ । यसमा महानगरको स्रोत परिचालन भएको छैन ।

काठमाडौं महानगरपालिका जनस्वास्थ्य विभागका प्रमुख हरिबहादुर कुँवर पीसीआर परीक्षण, कोभिड संक्रमण भएका र अन्य बिरामीलाई अस्पताल पुर्‍याउन सहजीकरण गर्ने प्रक्रिया अघि बढाएको दाबी गर्छन् । उनकाअनुसार संक्रमणको प्रभावबारे वडास्तरीय तथ्यांक संङ्कलनका लागि ३२ सै ओटा वडा कार्यालयलाई सक्रिय गर्ने गरी छलफल भइरहेको छ ।

‘‘हामी अहिले महामारी नियन्त्रणको छलफलमै छौँ । मेयर उपमेयरको टोली लगायत सबै वडाका प्रतिनिधि कर्मचारीबीच छलफल चलिरहेको छ । पहिलेअनुसारले नै सबै सेवा सुविधा उपलव्ध गराउने पक्षमा छौँ । महानगरको तर्फबाट हामीले महामारी रोकथाम गर्न पहिले गरे अनुसारले नै गर्ने भन्नेछ,” उनले भने, ‘‘कोरोना महामारी काठमाडौंवासीको सहजताको लागि एम्बुलेन्सको व्यवस्था मिलाइएको छ ।”

काठमाडौं महानगरपालिकाका प्रमुख प्रशासकीय अधिकृत राजेश्वर ज्ञवाली महामारीका बेलामा प्रक्रिया मात्र हेर्दा महामारी नियन्त्रण गर्न कठिन हुने बताउँछन् । उनी महानगरको जनशक्ति काठमाडौंवासीको सेवामा खटिने भन्दा पनि आफै जोगिनतर्फ प्रोत्साहन गर्छन् । 

ज्ञवालीले महानगरपालिकाले महामारी न्यूनीकरण, रोकथाम र नियन्त्रणका लागि वडा स्तरमा छलफल गरेको बताए । ‘‘अहिले हामी छलफलको क्रममै छौँ । वडास्तरबाट वडाध्यक्ष र वडा सदस्यहरूसँगको समन्वयमा काठमाडौंमा अत्यावश्यक काम नरोकिने गरी वडा स्तरबाटै जनशक्क्ति परिचालन गर्ने छौँ,” ज्ञवालीले भने ।  

जिल्ला प्रशासन कार्यालयले गरेको निषेधाज्ञामा महानगरबाट दिइने सबै सेवामा प्रभावकारी बनाइने उनको दाबी छ । महानगरले यतिखेर कार्यालय सञ्चालन गर्ने बाहेकका कुनै पनि क्रियाकलाप गरेको देखिदैन ।
 
बिहीबार वडास्तरीय छलफलमा कार्यालय सञ्चालन तथा सेवा प्रवाहका बारेमा साझा मत निर्माण गर्ने उद्देश्यले प्रशासन विभागले वडा सचिवहरूलाई छलफलका लागि बोलाएको थियो । 

अर्कातिर प्रशासन कार्यालाय कम जनशक्ति परिचालनले धेरै परिणाम निकाल्ने भन्दै रोकथामको परिणाम ननिकाली बसेको छ । प्रशासन विभागका प्रमुख महेश काफ्ले कमभन्दा कम जनशक्तिबाट धेरै परिणाम आउने गरी काम गर्नुपर्ने बताउँछन् । 

काम कुरिरहेछन् नगरप्रहरी 
दिनप्रति दिन महामारी बढ्दै गएको बेलामा महानगरका प्रहरी काठमाडौंवासीलाई सेवा प्रदान गर्नुको साटो काम नपाए जसरी कामको पर्खाइमा छन् । नगरप्रहरी प्रमुख धनपति सापकोटाले आफूहरूले निर्देशनअनुसार काम गर्ने बताए । आफूहरूले वडाहरूलाई काम भएमा खबर गर्न भनेको उनले बताए ।

काठमाडौं महानगरपालिका जनस्वास्थ्य विभागकाअनुसार अहिले महानगरमा कोरोनाविरुद्ध कसरी अगाडि बढ्ने भन्नेबारे छलफल चलिरहेको छ । 

काठमाडौं महानगरको यस्तै लापरबाहीले पहिलो चरणको कोरोनाको बेला खानासमेत नपाएर कैयाैँ मानिस सडकमा आउनु परेको थियो । ती मानिसहरूलाई सामाजिक अभियन्ताले सडकमै खाना वितरण गरेका थिए ।