लस एन्जलस । आइतबार (अप्रिल २५) हुने ओस्करको प्रत्यक्ष प्रसारण (समारोह) सहभागी हुनेहरुले फेस मास्क लगाउनु नपर्ने एकेडेमी अफ मोसन पिक्चर आर्ट्स एन्ड साइन्सेसले घोषणा गरेको छ । सोमबार भएको जुम मिटिङमा एकेडेमीले यस्तो बताएको हो ।

लस एन्जलसको युनियन स्टेसनमा आयोजना हुन लागेको शोमा क्यामेरा रोल हुँदा पाहुनाहरुले मास्क लगाउन जरुरी नभएको एकेडेमीका कर्मचारीहरुले उल्लेख गरेका छन् । यद्यपि, क्यामेरा रोल नहुँदा भने मास्क लगाउनुपर्नेछ । जस्तै, विज्ञापन आइरहँदा भने मास्क लगाउनुपर्नेछ ।

स्टुडियोमा मात्रै १७० अर्थात् सीमित पाहुनाहरुबीच ओस्कर सञ्चालन हुनेछ । भेराइटी डटकमका अनुसार शोमा सहभागी हुने पाहुनाहरु र नोमिनेसनमा परेका कलाकारहरु आउने–जाने भइरहनेछ ।

हलमा प्रवेश गर्नुपूर्व प्रत्येको शारीरिक तापक्रम जाँच गरिनेछ भने सहभागी हुनेले कम्तीमा तीनपटक कोभिड परिक्षण गरेको हुनुपर्नेछ । रेड कार्पेटमा पनि केवल तीनजना फोटोग्राफरहरु मात्रै हुनेछन् भने मिडियाहरु पनि सेलेक्टेड मात्रै हुनेछन् ।

यसका साथै अन्तर्वार्तामा पत्रकार र कलाकारबीच सात फिटको दूरी राखिने एकेडेमीले जानकारी दिएको छ । विजेताहरुले भर्चुअल अन्तर्वार्ता पनि दिन पाउनेछन् ।