काठमाडौं । महानगरीय ट्राफिक प्रहरी महाशाखाले चोरी भएका १७ वटा मोटरसाइकल र ९ वटा स्कुटर गरी २६ वटा मोटरसाइकल सवारी धनीलाई बुझाएको छ ।

काठमाडौँ उपत्यकाका विभिन्न स्थानहरु तथा धादिङ, चितवान, मकवानपुर, बारा जिल्लाबाट चोरी भएका उक्त मोटरसाइकलहरू खोजतलास गरी सवारी धनीहरुलाई दिइएको हो । महाशाखाका प्रमुख एसएसपी जनक भट्टराईले सम्बन्धित सवारी धनीलाई जिम्मा लगाए । 

एसएसपी भट्टराईले महाशाखाले सवारी–साधनको चोरी नियन्त्रण गर्ने अभियानलाई तीव्रता दिइरहेको बताए । उनले भने, “अधिकांश मोटरसाइकलहरू एकान्त तथा सुनसान स्थानबाट चोरी हुने गरेको पाइएको छ । चोरी भएका मोटरसाइकलहरू नम्बर प्लेट र स्वरुप परिवर्तन गरी नक्कली कागजपत्र बनाई बेचबिखन गर्ने गरेको पाइएको छ ।”