काठमाडौं । विभागीय टोली सशस्त्र प्रहरी बलको एपीएफ क्लबले १९औँ आहा-रारा गोल्डकप फुटबल प्रतियोगितामा विजयी सुरुवात गरेको छ । शनिबार पोखरा रंगशालामा भएको उद्घाटन खेलमा सशस्त्रले आयोजक टोली सहारा क्लबलाई १–० ले पराजित गरेको हो ।
सशस्त्रका आशीष लामाले खेल सकिन तीन मिनेट बाँकी रहँदा गरेको गोल नै नतिजामा निर्णायक बन्यो । प्रदीप लामाले डीबक्सभित्र दिएको बललाई आशीषले गोलमा परिणत गरेका थिए ।
जितसँगै सशस्त्रले सेमिफाइनलमा स्थान बनाएको छ । सशस्त्रले दुई वर्षअघि पनि सहारालाई उद्घाटन खेलमै पराजित गरेको थियो ।
सशस्त्रले अब सेमिफाइनलमा मनाङ-मर्स्याङ्दी र संकटा क्लबबीचको विजयी टोलीसँग प्रतिस्पर्धा गर्नेछ । आइतबार मच्छिन्द्र क्लब र अफ्रिकन युनाइटेडबीच प्रतिस्पर्धा हुनेछ ।
सहारा क्लबले प्रतियोगिताको उद्घाटन समारोहमा नेपाली राष्ट्रिय फुटबल टिमका सदस्य अभिषेक रिजाललाई सम्मान गरेको थियो । रिजाललाई नगद ३५ हजार रुपैयाँसहित सम्मान गरिएको हो ।